САХНАДА – «АБАЙ» СПЕКТАКЛІ

САХНАДА – «АБАЙ» СПЕКТАКЛІКеше Н.Бекежанов атындағы облыстық қазақ музыкалық драма театрында Ерсайын Төлеубайдың «Абай» спектаклінің премьерасы болды.
Бұл қойылым ұлы ақын Абай туралы қазақ сахнасында 1940 жылдан бері қойылып келе жатқан үлгіден мүлдем бөлек. Жаңа көріністе заңғар ақынның алпысқа қараған шағында өз ортасынан орнын таппай, ауыр ойды арқалап, іштей егілген кезі суреттеледі. Оның тағдыры тым ауыр жағдайларға толы болды. Оразбай, Тәкежандардың озбырлығы, жолын қуған жастардың талайлы тағдыры, араларына алты айдан салып, балаларының көз жұмуы, ақын жаның тұңғиық қасіретке тартады. Жақсы көретін ұлы Мағауияның қырық күндігін беріп өзі де сол тұңғиықтан шыға алмай бақи фәниге аттанады. Іргелі әулеттің мұңлы тағдыры осылайша өрбиді. 
Қойылымда «Соқтықпалы соқпақсыз жерде өсіп, мыңмен жалғыз алысқан жанның» тереңдегі жұмбағы, Абай азабының айтылмай қалған тылсым бейнесі көрсетіледі. Ерсайын Төлеубайдың «Абай» пьесасы бойынша қойылған спектакль өскелең ұрпақты ұлтжандылыққа, отансүйгіштікке, тіліміз бен дінімізді берік ұстауға тәрбиелейді.   
Спектакльдің қоюшы режиссері ҚР еңбек сіңірген қайраткері Хұсейін Әмір-Темір. Абай рөлін Қазақстан жастар сыйлығының лауреаты Бақытбек Темірбеков сомдады. 
Қойылымды облыс әкімі Қырымбек Көшербаев, қоғам және мемлекет қайраткері, Қазақстанның Еңбек Ері, халық жазушысы Әбіш Кекілбаев көріп, тамашалады.
Нұрбек ДӘУРЕНБЕКОВ.

НЕГІЗГІ ЖАҢАЛЫҚТАР / РУХАНИЯТ 16 қараша 2013 г. 1 072 0