ЕКІЖАҚТЫ ӘРІПТЕСТІК ТЕРЕҢДЕЙ БЕРЕДІ

ЕКІЖАҚТЫ ӘРІПТЕСТІК ТЕРЕҢДЕЙ БЕРЕДІКеше Қазақстан Президенті Нұрсұлтан Назарбаев ресми сапармен келген Испания Корольдігі Үкіметінің төрағасы Мариано Рахоймен кездесу өткізді.
Кездесу барысында Қазақстан-Испания стратегиялық серіктестігін одан әрі дамыту мәселелері талқыланды.
Экономика, инвестиция, көлік, өнеркәсіп, жаңартылатын энергетика, мәдениет салаларындағы және өзге де бағыттардағы ынтымақтастыққа кездесуде ерекше назар аударылды.
Нұрсұлтан Назарбаев Қазақстан өз тәуелсіздігінің алғашқы күндерінен Испаниямен қарым-қатынасты нығайтып келе жатқанын атап өтті.
– Біз Испания Корольдігінің қолдауы мен ықыласын ұдайы сезініп келеміз. Қазақстанға сапармен келген Испанияның бұрынғы премьер-министрлерімен достық қарым-қатынаста болдық. Сіздердің елдеріңіз «ЭКСПО-2017» бүкіләлемдік көрмесін өткізуге арналған конкурста біздің өтінімімізге қолдау көрсетті. Бұған қоса, Қазақстанның ЕҚЫҰ-ға төрағалығы туралы шешімнің Мадридте қабылданғанының символдық мәні зор. Қазіргі уақытта елдеріміз арасында стратегиялық серіктестік туралы келісім бар. Қазақстанда Испанияның ірі компаниялары жұмыс істейді, 70-тен астам бірлескен кәсіпорын қызмет атқаруда. Біз Үкіметтің қызметі арқасында Испанияның экономикалық дамуы қалпына келе бастағанын және орнықты деңгейге шыққанын көріп отырмыз, – деді Мемлекет басшысы.  
Өз кезегінде М.Рахой Қазақстанға келіп қайтуға шақырғаны үшін алғысын айтты.
– Испания мен Қазақстан бұрыннан өте жақсы қарым-қатынаста. Сәл кейінірек мен сізге Аса Мәртебелі Испания Королінің өз қолымен жазған хатын тапсыратын боламын. Сіздің Мадридке жасаған өткен жылғы сапарыңыз есімде. Біздің компанияларымыз мұнда шын мәнінде өте табысты жұмыс істеуде. Бірлескен қызметке атсалысу ниетіндегі Испания кәсіпорындары өкілдерінің қалың тобы менімен бірге келді. Егер Испания мен Еуропадағы экономикалық ахуал туралы айтсақ, мен Үкімет басына келген уақыттан бері алғаш рет бізде оң нәтижелер көріне бастады. Бұл тоқсанда экономикада сәл өсім болмақ. Жұмыссыздық жөніндегі мәліметтер алдыңғыға қарағанда биыл өте жақсы, дегенмен бұл келесі жылы ахуал тіпті жақсырақ болады деп қуануға себеп емес. Біз ауқымды реформалар жүргізуді жалғастыра береміз, – деді Испания Үкіметінің төрағасы.
Келіссөздер барысында Нұрсұлтан Назарбаев испан тарапына екінші Дүниежүзілік соғыс кезеңінде Қарағанды еңбекпен түзеу лагерінде болған испандық азаматтарға қатысты Мемлекеттік мұрағаттан алынған материалдар көшірмесін тапсырды. 


НЕГІЗГІ ЖАҢАЛЫҚТАР / АҚПАРАТ 01 қазан 2013 г. 735 0

Едел-Жедел

Күнтізбе

«    Қаңтар 2018    »
ДсСсСрБсЖмСбЖс
1234567
891011121314
15161718192021
22232425262728
293031