Қызылордалық өнертапқыш Марат Палмахов баламалы энергия көзін тапты. Бұл мақсатқа ол қарапайым заттар мен құралдарды пайдаланды.
Отыз жастағы өнертапқыш өзі жасап шығарған қозғалтқыштың өндірісте өнімділікті арттыратынына сенеді. Оның ойынша, осы жетістіктің нәтижесінде үлкен қалалардағы экологиялық ахуалды жақсартуға мүмкіндік бар.
Өнертапқыш бұл жобаны бес жылдан бері жоспарлап жүрген. Алдымен идеясын қағаз бетіне түсіріп, оның формуласын жасап шығарды. Құрылғы сумен қуат өндіре алады. Сол арқылы ірі өндіріс ошақтарын жарықпен қамтамасыз етуге әбден болады.
Айтуынша, жобаның қырыққа тарта нұсқасы зерделеуден өткен. Әрбірінен табылған қателіктер түзелген. Бірнеше сынама жасап көрді. Құрылғы тек электр қуатын өндіріп қоймайды. Ол сумен қамтуға да мүмкіндік туғызады. Осылайша, оны екі функцияны атқаруға пайдалануға болады.
Өнертапқыш аталған құрылғыны шалғай елді мекендерде электр қуатымен жабдықтау мақсатында пайдалануға болатынын айтады. Сондай-ақ, биік жерде орналасқан егіс алқаптарын аталған құралды пайдалану арқылы суаруға мүмкіндік бар. Ол климаттық жағдайға ешбір тәуелді емес. Оған күннің сәулесі мен желдің күшінің қажеті жоқ. Су көзі мен оның сағасы болса жетіп жатыр. Сондықтан артық шығын кетпейді. Өнертапқыш экологиялық таза құрылғы алдағы уақытта өндіріске енгізілетініне сенеді.
Әділет ТАЛАПТАН
>>> Біздің Facebook, Instagram парақшаларымыз бен Telegram каналымызға жазылыңыз! <<<
