Мемлекет басшысы Жоғары Еуразиялық экономикалық кеңестің отырысына қатысты

43

0

Мемлекет басшысы Жоғары Еуразиялық экономикалық кеңестің отырысына қатыстыКеңес отырысы Қазақстан Республикасының Президенті Нұрсұлтан Назарбаев, Ресей Федерациясының Президенті Владимир Путин және Беларусь Республикасының Президенті Александр Лукашенконың қатысуымен өтті.
Келіссөздер барысында Кеден одағы мен Еуразиялық экономикалық кеңістік аясындағы өзара ықпалдастық мәселелері талқыланды. Мемлекеттер басшылары Еуразиялық экономикалық одақ туралы шарт жобасын дайындау жұмысының қорытындысын шығарды. Бұдан бөлек, үш елдің көшбасшылары еуразиялық экономикалық интеграцияға қатысушылардың құрамын кеңейту мәселелерін қарастырды.
Қазақстан Президенті Еуразиялық экономикалық одақ туралы шарттың жобасын жасау кезінде пысықтауды қажет ететін бірқатар жайттарға назар аударып, болашақ одақты құруға қатысты барлық мәселелер мен келіспеушіліктер өз шешімін табатынына сенімін білдірді.
– Мейлінше күрделі жайттар үшін өтпелі кезең қажет болады. Барлық мәселелерді біз Кеден одағын құру және Бірыңғай экономикалық кеңістікті қалыптастыру кезінде талқылағанымызды еске салғым келеді. Бүгін біз әр тармақты сеніммен талқылап, не істегеніміз жөн екенін шешетін боламыз деп ойлаймын. Біз әрдайым консенсусқа қол жеткізіп келдік және алда да солай болады деп сенемін, – деді Нұрсұлтан Назарбаев.
Ресей Президенті Владимир Путин Қазақстан Президентінің Еуразиялық экономикалық одақ құрудағы айрықша рөлін атап көрсетті.
– Нұрсұлтан Әбішұлы Назарбаевқа зор алғысым мен ризашылығымды білдіремін, өйткені ол осы бірлестіктің негізін қалаушыларының бірі, рухтандырушысы болды. Әуелден бұл оның идеясы еді. Кеше ММУ-де оның соншалық тиянақты, тәжірибеге негізделген баяндама жасауы, онда дамудың, біздің практикалық жұмысымыздың теориялық базасының перспективалары көрініс табуы, соның барлығы Қазақстанның бұған барынша байыппен қарайтынын көрсетеді. Шынында да, біз құрған Кеден одағы жұмыс істеп, нақты пайда әкелуде. Бірақ біз өзара ықпалдастығымызды тереңдету бағытында тағы бір қадам жасап, ынтымақтастығымызды одан да жоғары деңгейге шығара аламыз, – деді Ресей Президенті.
 Осыдан кейін кеңестің кеңейтілген құрамдағы отырысы өтіп, онда Еуразиялық экономикалық одақ туралы шарттың негізгі ережелері қосымша талқыланды, сондай-ақ Кеден одағы мен Бірыңғай экономикалық кеңістікке Армения Республикасының қосылуы жөніндегі іс-шаралар жоспарының жүзеге асырылу барысы қаралды.
Пікірлер жоқ. Бірінші болыңыз!

Пікір жазыңыз