Әріптестік байланыс нығая береді

73

0

Облыс әкімі Қырымбек Көшербаев бастаған делегация ақпараттық технологиялар, ауыл шаруашылығы және индустрия салаларындағы жобаларды жүзеге асыруда тәжірибе алмасу мақсатында Татарстан Республикасына іссапармен барды. Делегация құрамында мемлекеттік орган басшылары және өңірлік компаниялар мен мекемелердің өкілдері болды.
Сапар барысында Қызылорда облысының әкімдігі мен «Иннополис» ЕЭА және облыстық ауыл шаруашылығы басқармасы мен «Қазан» агропаркі арасында бірлескен жобаларды жүзеге асыру бойынша әріптестік туралы меморандумдарға қол қойылды.
Қазан қаласындағы Инвестициялар агенттігінде Татарстан Республиканың экономикалық әлеуеті таныстырылды.
Мұнан кейін қызылордалық делегация «Эйдос» медициналық ғылым орталығының медициналық симуляторларды шығаратын өңірлік инжиниринг орталығының жұмысымен танысты. Орталық 2013 жылы ашылған және жетекші ғылыми-өндірістік ұйымдармен бірлесіп, медицина саласындағы жоғары технологиялық зерттеулермен айналысады.
Сонымен қатар, қызылордалықтар «Қазан» агроөнеркәсіп паркінің жұмысымен танысты. Заманауи көпфункционалды технологиялық кешенде «фермерден тұтынушыға делдалсыз жеткізу» қағидасына негізделген ауылшаруашылық өнімдерін сату жүйесі енгізілген. Бұл жүйе өндірушіге табысты бизнес жүргізу үшін жағдай жасаса, тұтынушыға сапалы өнімді тиімді бағамен сатып алуға мүмкіндік береді. Агропарк аймағында ауылшаруашылық өнімдерін өндірушілерге өнімдерін бір алаңқай аясында сақтауға, өңдеуге, қаптауға және сатуға барлық жағдай жасалған.
Сонымен қатар, делегация мүшелері сапардың негізгі ны­саны – Қазан қаласынан 40 шақырым қашықтықта ор­наласқан «Иннополис» ерекше эко­номикалық аймағын ара­лап көрді. Иннополис – ІТ-ма­мандар үшін 2015 жылы ашыл­ған алғашқы ресейлік қала. «Ақылды қала» тұжырымдамасы аясында Иннополис тұрғындары жайлы өмір сүру мақсатында инфрақұрылым, бизнес, білім алу, қызмет көрсету және тұрмыстық нысандар салынды. Қазіргі таңда мұнда 3 мыңнан астам адам тұрады және 120 компания, оның ішінде «Иннополис» ЕЭА 56 резиденті мен серіктесі тіркелген. Қызылордалықтар «Иннополис» университеті мен лицейінің, проб­ле­малық зертханалар мен енгізілген корпоративтік бас­қару қағидаларына үлкен қызы­ғушылық білдірді.
Сапар қорытындысында Татар­стан Республикасының басшы­лығымен келіссөздер жүргізіліп, облыс әкімі бірлесіп атқаратын жұмыстар туралы баяндады. Қызылорда қаласында күзде өтетін «Сабантой» республикалық татарлар мерекесіне қатысуға шақырды.
«Біз ақпарат және сандық технологиялар дәуірінде өмір сүріп жатырмыз, ал Татарстан бұл бағытта тек ресейлік қана емес, бүкіл бұрынғы Кеңес Одағының аумағында көшбасшы саналады. Мұнда тың жаңалықтар көп екеніне Иннополис қала­сына барғанда көзіміз жетті. Татар­стан президенті Рустам Миннихановқа біздің жастарды Иннополис университетінде оқы­ту идеямызды қолдағаны үшін алғыс білдіреміз. Біз қазір әріптестік жөніндегі бірлескен Жол картасын әзірлеуге кірістік», – деді облыс әкімі Қ.Көшербаев.
Татарстан Республикасының президенті Рустам Минниханов Қызылорда облысымен әріптестік орнатуға қызығушылық білдірді.
«Қызылорда облысы белсенді дамып, инвесторларды көптеп тартып жатыр. Біз Қазақстан аймақтарымен экономика-сау­да саласымен қатар, білім, инфрақұрылым-инновациялық даму, туризм салалары бойынша әріптестік жасауға мүдделіміз. Биз­несті қолдау шарттары да тиімді көрінеді. Біздің мәде­ние­тіміз, менталитетіміз және дініміз өте ұқсас», – деді Р.Минниханов.
Естеріңізге сала кетейік, Татарстан президенті Рустам Мин­ниханов өткен жылы желтоқсан айында Қызылорда облысына қысқа мерзімді жұмыс сапарымен келген болатын.
Сондай-ақ, Қызылорда облысы мен Татарстан Республиканың негізгі әріптестігі білім мен денсаулық сақтау салалары екенін атап өткен жөн.
Мұнан бөлек, Ресей Феде­рациясына жұмыс сапары аясында облыс әкімі Қ.Көшербаев және бірқатар мемлекеттік орган басшылары 16-18 қаңтар күндері Мәскеу қаласында Халық шаруашылығы және мемлекеттік қызмет академиясында өткен «Гайдар форумына» қатысты.
Форум барысында экономика және сандық технологияларға ауысу, төртінші өнеркәсіп рево­люция кезеңінде трансфор­мация­лар секілді бүкіл дүниежүзілік қоғамдастықты қызықтыратын басты мәселелер талқыланды.
«Гайдар форумы» – 2010 жыл­дан бастап өткізілетін эко­но­мика саласындағы жыл са­йын­­ғы халықаралық ғылыми-прак­тикалық конференция. Форум­­­­­ды ұйымдастырушылар – РХШжМҚА, Е.Т.Гайдар атындағы Экономикалық саясат институты және Ресей инновациялық аймақтар қауымдастығы, форум­ға жетекші ресейлік және шетел­дік ғалымдар, сарапшылар, мем­ле­кеттік органдар мен бизнес ұйым­дарының жетекшілері қатысады.
Ұйымдастырушылардың айтуын­ша, биыл қатысушылар саны рекордтық көрсеткіш – 15 мың адамға жеткен.
Облыс әкімінің баспасөз қызметі.
Пікірлер жоқ. Бірінші болыңыз!

Пікір жазыңыз