ЖАПОНДЫҚТАР ҰЛТТЫҚ ДӘСТҮРГЕ ТӘНТІ БОЛДЫ

81

0

 

 

Қазақстан және Жапония Парламенттері достық лигасының өкілдері Қорқыт ата мемориал­дық кешеніндегі этноауылда болды.

Аталған лига төрағасы Такео Кавамура бастаған делегация өкілдері қазақылықтың қаймағы бұ­зылмаған Сыр еліндегі салт-дәстүр мен ұлттық қолөнердің дәріптелуіне тәнті болды. Күн­шығыс елінен келген қонақтар қаз-қатар тігілген шеберлер үйін аралап, қолөнершілермен тілдесті. Шеберлік сабақтарына куә болды. 

Ұлттық тағамдар мен сусындардан дәм татты. Сонымен қатар, қазақша күрес, шабандоздардың өнері, ханталапай мен алтыбақан ойынын тамашалады. Жусан иісі аңқыған кең даладағы қазақтың ауылына таңдай қақты. Этноауылдың қызығына берілген Жапония делегациясы, керек десеңіз, Қызылорданың шіліңгір аптабын елемегенінен де байқауға болады. Олар шөлін салқын сабаттағы қымызбен басып, сән-салтанаты келіскен киіз үйдегі көрмелерді көріп, қа­зақтың ыс­тық ықы­ласы мен қонақ кәдесіне куә болды.

Қолөнершілер қонақтарға әр бұйымның жа­са­лу әдісімен бөлісті. Меймандарға Қорқыт бабамыздың ғұмыры жайлы тарихи әңгімелер мен кең даладағы қобыз үні де ерекше әсер еткен. Ол жайында делегация жетекшісі Такэо Кавамура былайша тарқатады.

– Қазақ халқынын өз салт-дәстүрін дәріптеп, басқаларға көр­сетіп жатқаны мені қатты толқытты. Қорқыт ата кесенесіне келгенде бір нәрсеге көзім анық жетті. Ежелгі тарихтан хабардар болып, оны ұрпаққа табыстап отыратын ел екенсіздір. Өз мәдениетіңе деген құрмет осындай-ақ болсын. Алған әсерімді айтып жеткізе алмаймын, – дейді.

20 маусымда ашылған Қазақ ауылы әлемнің түкпір-түкпірінен келетін қонақтарды қоңыр күздің ортасына дейін қарсы алуға әзір. Облыс бойынша ЭКСПО картасына аймақтағы Қорқыт баба кесенесі мен Байқоңыр ғарыш айлағы енген. Баба басына зиярат жасағандар қатары екі аптада мың жарым адамға жетіп үлгеріпті. Соны­мен қатар, этноауыл ұйым­дастырушылары еліміздегі туристік компаниялармен тығыз жұмыс істеуде. Ол ­туралы ЭКСПО-2017 ресурстық орталығының басшысы Жандос Тұсмағамбетов айтты.

– Оннан астам мемлекеттен шетелдік туристер келіп отыр. Атап айтқанда, Франция, Румыния, Қырғызстан, Өзбекстан, Ресей Федерациясынан, Германия, Голландия. Енді, міне, Жапония ­азаматтары этноауылымызда қонақта. Бұл әлі қонақтардың басы. Алдағы уақытта шетелдік қонақтардың қызы­ғушылық танытып, кө­бейетіні бел­гілі, – деді.

«ЭКСПО 2017» этноауылында тұлпар мініп, атқа шабуды қалаған меймандарға үйретуге шабандоз жігіттер әрқашан әзір. Асық атып, ханталапай ойнауға да болады. Этноауылда жүрекке жағымды қазақ әндері әуелеп тұрады. Немесе жан толқытар күйлер төгіледі. Шөл дала жусанының керемет иісіне елітіп, дала желінің уілін естіген турис­тер қазақ елінің қонақжайлығына тәнті болып, бар ризашылығымен ақті­лектерін жаудырып-ақ жатыр. ­Осы­лайша, жапондық өкілдер жер кіндігі – Байқоңырдың кереметіне үңілуге аттанды.

Жалпы, этноауылда 7 киіз үй бар. Оның әрқайсысында түрлі қол­өнер бұйымдары қойылған. Он­да киізден, былғарыдан, саздан, иіріл­ген жіптен, ағаштан жасалған бұйымдар мен кілем мен зергерлік өнімдер қойылған. Бұл үйлерде ке­лу­ші­лер үшін тегін шеберлік сабақ­тары өтеді.

Ауылда 11 қолөнерші жұмыс істеуде. Олардың барлығымен келі­сім-шарт жасалған, жалақы мәселесі шешілген. Сондай-ақ, мұнда 12 қыз­меткер еңбек етеді. Барлығы жатын орнымен және үш мезгіл тамақпен қамтылған.

Нұрбек ДӘУРЕНБЕКОВ.

Қармақшы ауданы.

Пікірлер жоқ. Бірінші болыңыз!

Пікір жазыңыз