Тарихты тану ұлттық рухты көтереді

100

0

Тарихты тану ұлттық рухты көтередіТопырағы тарихтан сыр шертетін Сыр елінде тарихи-мәдени орындар жетерлік. Алаштың анасы атанған өңірдің әрбір төбесінде айтылмаған сыр, жазылмаған шежіре жатыр. Ұлттық рухтың көсегесі көгерсін десек, осынау жәдігерлерімізді бүгінгі ұрпақ санасына сіңіріп, келер ұрпаққа басы бүтін аманаттауға тиіспіз. Бұл орайда Сыр елінде атқарылып жатқан жұмыстар мен қолға алынған бастамалар қатары ауқымды. Өткен сенбіде Қызылорда қаласындағы Қорқыт ата ескерткіші жанында «Сыр – Алаштың анасы” экспедициясының жолға шығу құрметіне орай салтанатты шара өтті. Жиынға облыс әкімінің орынбасары Руслан Рүстемов қатысып, сәттілік тіледі.
– Халқымыздың сан ғасырлар бойғы тарихында Сыр өңірінің алар орны айрықша. Мұны Елбасымыз Нұрсұлтан Назарбаевтың «Сыр – Алаштың анасы” деген сөзінен-ақ аңғаруға болады. Тарихқа көз жіберсек, ата-бабаларымыз хандықтар астанасын осы өңірге салды, өсіп-өркендеді, тамырын тереңге жайды. Оның куәгерлері тарихи жәдігер¬лерімізді, Алашқа қорған болған қасиетті орындарды танып-білу – ұлттық рухты көтеріп, сананы сілкіндірері сөзсіз. Сондықтан да «Сыр – Алаштың анасы” экспедициясының алға қойған мақсаты орындалуына тілектестігімді біл¬діремін, – деді облыс әкімінің орынбасары Р.Рүстемов.
Содан соң  «Консенсус” қоғамдық қоры директоры Ербол Күмісқожаев сөз сөйлеп, экспедицияның мақсат-міндеттерін тілге тиек етті. Аталған экспедицияның мақсаты – Сыр өңіріндегі тарихи-мәдени орындарды аралап, олардың насихатталуына үлес қосу. Шара аталған қоғамдық бірлестіктің бастамасымен, облыстық әкімдіктің қолдауымен жүзеге асырылып отыр. Қоғамдық ұйым жетекшісі Ербол Күмісқожаевтың айтуынша, экспедиция 20 күнге созылмақ. Облыстық жастар ұйымдарының өкілдері, блогерлер мен журналистерден құралған топ Жаңақорған мен Арал аралығындағы жүзден аса нысанды аралауды жоспарлап отыр. Сонымен бірге, экспедиция барысында тарихи-мәдени орындармен қатар облысымыздағы экономикалық-әлеуметтік маңызы бар нысандар да қамтылатын болады.
Нағымжан САУЯЕВ.
Пікірлер жоқ. Бірінші болыңыз!

Пікір жазыңыз