КЕШЕНІҢ КЕЛБЕТІ – БҮГІННІҢ БЕЙНЕСІ

 Жақында туған жердің тарихынан сыр шертетін тағы бір тағылымдық кітап жарық көрді. «Бозкөлден басталған белес» деп аталатын өмірнама бір адамның әпсанасы есепті дүние бол­ғанымен, тұтас бір өңірдің өткенінен естелік сыр шер­теді.

Автор Жарылқасын Шә­­ріпов 1963-1994 жылдары Қа­залы ауданының шаруашы­лықтарында, аудан­дық партия коми­тетінде қызмет еткен. Ау­данның тәуелсіздік жыл­­дарындағы алғашқы әкі­­мі болған. Мұнан соң Қызыл­орда қала­сының әкімі, облыс бойынша жыл­жымай­тын мүлік­терді бағалау ор­­­та­­­­­лы­ғының директоры, об­­лыс­тық мәслихаттың тексеру комиссиясының төр­аға­сы се­кілді жауапты қыз­мет­тер ат­қарған. 

Көргені көп, түй­гені мол тұл­ға­ның қала­мынан ту­ған бұл кітаптың келешек жас­тардың керегіне жар­­ар­­лық салмақты жүгі бар. Қиын­шы­лық кез­дерде халық қа­лай өмір сүрді, осы жолда жұмсаған аға буын­ның күш-жігері қандай болды, шы­ғармада осындай сұрақ­тардың арқауы тар­қатылып жүре береді. Кі­тап­тың өн-бойынан атым шық­сын деген емес, арты­мыздан келер ұр­пақ­қа өнеге қалсын деген ой оңай аңға­рылады. Дәл осы жөнінде ав­тордың өзі ал­ғы­­сөзінде былай кел­тіреді:

«Әрине, мен кәнігі жазушы емеспін. Бірақ, өмір ұстаз ғой, ол маған көрген-білгенімді бағалауды, одан қорытынды ой шыға­руды жас кезімнен-ақ үйретті. Сон­­дық­тан өз өмір­бая­ным­ды саралай алатыныма сенемін.

Өткен қоғамды теріс жа­ғынан көрсетіп, атқа­рылған істі, болған жақ­сылықты жоқ­қа шығарып, бүгінгі қо­ғам­нан жақсы ат алғысы келетін замандастарымыз да бар. Он­­дай кісілер зиялы қауым іш­і­нен де кездесіп қа­лады. Алай­да, саралап қара­саң, өт­кен қоғамда біз аң­ғармай кел­­­ген адамзаттың жақсы өмірге ұмтылуына, хал­­қы­мыздың қазынасын дәріп­теуге қойылған шектеу­лер және еңбекте адамды қанау­шылықтың жетілген, елеусіз,  байқалмайтын әдіс­­­­терімен бірге, осы заманда жетіспейтін адамдар ара­­­сындағы шынайы тең қа­тынастар, татулық, қам­­қор­лық секілді көптеген ар­­тық­шы­лықтар болғанын еш­кім жоққа шығара алмайды».

Алғысөзден алынған осы бір шағын үзіндінің өзі оның өн-бойындағы қан тамы­ры­ның лүпілін сез­­­діреді. Сон­дай-ақ, бұл кітап­тан ав­тор­дың және оның отба­сы­ның фо­­то­­сурет­терін көр­мейсіз. Бас­­талуы, шарық­тауы, қор­тын­дысы бар көркем шы­ғар­ма­­мен сусындайсыз.

Кітаптың поли­гра­фия­лық көркемделуі де көз тартарлық, 500 данамен «Тұмар» баспасынан жарық көрген.

 

Д.Беркінбаев.

ЖЕДЕЛ ЖАҢАЛЫҚТАР 06 сәуір 2019 г. 583 0