Облыстан – 30 делегат

Қызылордада «Nur Otan» партиясы облыстық филиалының кезектен тыс XХIV конференциясы өтті. Жиынды ашқан облыс әкімі, филиал төрағасы Қырымбек Көшербаев жауапты науқанды ұйымдастыру және өткізу жұмысын бірлесе атқаруға шақырды.
– Біз қазір мемлекет тари­хындағы тағдырлы таң­дау, сын­дарлы сәттің алдын­да тұр­мыз. Тәуелсіз Қа­зақ­­станның архитекторы, елі­міздің іргетасын қалап, ша­ңы­рағын тіккен Тұң­ғыш Президент Нұрсұлтан Әбіш­ұлы Назарбаев өкі­лет­тілігін тоқ­татып, Консти­туцияға сәй­кес мемлекет тіз­гінін Қасым-Жомарт Ке­мелұлы То­қаевқа тапсыр­ға­нын біле­сіздер. Біз осылайша ел өміріндегі саяси са­бақ­тастық пен ұрпақтар үндестігінің куәсі болдық. Ал алдағы саяси науқан – елдігіміз бен бірлігімізді, тұс­тастығымыз бен әлеуметтік тұ­рақ­ты­лығымызды танытатын ке­зең, – деді аймақ басшысы.
Конференцияның күн тәртібіндегі бірінші мәселе бойынша баяндамашылар кезектен тыс Президент сайлауын 2019 жылдың 9 маусымында өткізу туралы шешімді қолдайтынын жеткізді. «Nur Otan» партиясы саяси кеңесінің мүшесі, облыстық ардагерлер кеңесінің төрағасы Серік Дүйсенбаев, Қазақ­стан халқы Ассамблея­сы жанындағы аналар кеңесінің төрайымы Нұрсәуле Мұсаева Президент үндеуін қазақ­стандықтардың риза­шы­лықпен қабылдағанын, кезектен тыс сайлау өткізу туралы шешім уақыт талабымен үндесетінін айтты.
– Елдегі соңғы өзгерістер мен қоғамдық-саяси жаңа­лықтарды елеусіз қалдыр­майтын ардагерлер наурыз айындағы билік транзитінің жаймашуақ қалыпта жүзеге асқанына риза. Отандастарымыз ғана емес, төрткіл дүние құлақ түрген шешім – Елбасының мемлекет абыройын асқақтатып, бо­лашағын жарқын етуді ойлағанынан туған бірден-бір дұрыс жол. Халық аталған өзгерістерді тү­сіністікпен қабылдап, қолдау білдіруде, – деді С.Дүйсенбаев.
Одан кейін Елбасының партияның кезекті ХVІІІ съезінде берген тапсыр­мал­арының орын­далу жайы сөз болды. Облыстық жұмыспен қамтуды үйлестіру және әлеуметтік бағдарламалар бас­қармасының басшысы Талғат Дүйсебаев «Халыққа көмек», «Бақытты отбасы» жо­ба­ларының маңызына тоқталды.
Ал «Nur Otan» пар­тиясы сайлауалды бағдар­ламасының «Аграр­лық сектор» бағы­тындағы ай­мақтық комис­сиясының жетекшісі, облыс­тық мәсли­хат депутаты, «Жан-Арай» ЖШС директоры Бақдәулет Мақашов «Ауыл – ел бесігі», «Құтты мекен» жобалары аясында атқарылған жұмысты баяндады.
– «Ауыл – ел бесігі» жо­басының әлеуметтік инфра­құрылымды дамыту бағыты аясында жоспарланған 9 ковор­кинг орталығының 8-і ашылды. Биыл 41 мектептің, 20 аулалық спорт алаңы жаң­ғыртылады. Ауылды кадрмен қамтамасыз ету бағытында дипломмен ауылға мамандар тар­ту мүмкіндіктері қа­рас­­тырылуда. Ауылда жас­тар кәсіпкерлігін дамыту – басым бағыт. Осы орайда биыл 83 жастың 22 шаруа қожалығында тағылымдамадан өтуіне жағдай жасалып отыр, – деді Б.Мақашов.
Жиын соңында ашық дауыспен партия съезіне 30 делегат сайланды. Аймақ басшысы саяси науқан кезінде жетекші партияға жүктелер жүк пен жауапкершілік салмағы арта түсетінін атап өтті.

Назерке САНИЯЗОВА.
ЖЕДЕЛ ЖАҢАЛЫҚТАР 21 сәуір 2019 г. 358 0

Едел-Жедел

Күнтізбе

«    Қаңтар 2020    »
ДсСсСрБсЖмСбЖс
 12345
6789101112
13141516171819
20212223242526
2728293031