Тұрмысы төмен отбасылардың несиелерін кешіру акциясы қайта өткізіле ме?

Бұл сұраққа Президент Әкiмшiлiгiнің өтiнiштердi қарауды бақылау бөлiмiне сілтеме жасай отырып Stan.kz сайты жауап берді. 
"Бөлімге арызданушылардан өмірлік қиын жағдайға тап болған азаматтар үшін несие бойынша борыш жүктемесін төмендету туралы сұрақтар түсіп жатыр. Осыған орай, Мемлекет басшысының тапсырмасына сәйкес, бұл шара бірреттік тәртіппен жүргізілгендігін хабарлаймыз», - делінген ресми ақпаратта.
Аталған акция екінші деңгейлі банктер мен шағын қаржы ұйымдары кепілдіксіз тұтынушылық несиелері бойынша есептелген айыппұлдар мен өсімпұлдарды есептен шығару туралы шешім қабылданған қазақстандықтарға қатысты болды.
Сонымен қатар өмірлік қиын жағдайда қалған қазақстандықтар, атап айтқанда, көпбалалы отбасылар; асыраушысынан айрылу жағдайына байланысты төлем алатын отбасылар; 18 жастан асқан бала жасынан мүгедектер бар отбасылар; атаулы мемлекеттік әлеуметтік көмек алатындар; жетім балалар; 2019 жылғы 26 маусымдағы жағдай бойынша ата-анасынан кәмелеттік жасқа дейін айырылған, 29 жасқа толмаған, ата-ананың қамқорлығынсыз қалған балаларға акцияға қатысу мүмкіндігі берілді. Бір қарыз алушыға негізгі борышы мен оған есептелген сыйақыдан тұратын өтелетін берешегінің мөлшері 300 000 теңгеден аспайтын болса, оларды өтеу жолымен көмектесуге шешім қабылданды. Бұл ретте кепілсіз тұтынушылық қарыздары бойынша қарыз алушылардың жалпы берешегі 2019 жылғы 1 маусымдағы жағдай бойынша 3 млн теңгеден аспауы тиіс.
«Бұл акция 2019 жылы аяқталды. Оның қорытындысында жалпы сомасы 115 млрд теңгені құрайтын 554 мың азаматтың кепілсіз тұтынушылық несиелері бойынша борыштар есептен шығарылды. Таяу уақытта бұл акцияны қайталау жоспарланып отырған жоқ», - деп көрсетілген әкімшілік мәлімдемесінде.


ЖЕДЕЛ ЖАҢАЛЫҚТАР 03 наурыз 2020 г. 703 0