Сотталғандар құқықтарын қорғау үшін түзеу мекемелерінде прокурор кабинеттері жұмыс атқаруда

107

0

Сотталғандар құқықтарын қорғау үшін түзеу мекемелерінде прокурор кабинеттері жұмыс атқаруда Қылмыстық-атқару жүйесінің  Қызылорда қаласында қатаң режимдегі ЗК-169/5 түзеу мекемесі мен ЗК-169/1 тергеу изоляторы, Шиелі ауданында ЗК-169/4 қоныс-колониясы орналасқан.
Бүгінгі күні түзеу мекемелерінде барлығы 703 сотталған жаза өтесе, тергеу изоляторында  қамауға алынған  133 адам ұсталуда. Жаза өтеушілерді жеке қабылдау арқылы өтініштерін қарап,  құқықтарын қорғау үшін барлық мекемелерде прокурор кабинеттері ашылып, қызмет атқаруда.
Мекемелерде аптасына үш рет кездесулер жүргізіп, олардың шағымдары мен өтініштерін мерзімінде шешу жолға қойылды.
Қатаң режимдегі түзеу мекемесінде ұзақ мерзімдерге сотталғандар жаза өтейтіні ескеріліп, облыс прокуроры Х.З.Дәуешовпен 13 сәуірде жеке қабылдаулар жүргізілді.       
Қорытындысымен сотталғандардың жазаларын тұрғылықты жеріндегі мекемелерде өтеуге ықпал жасау туралы ұсыныстары ескерілді. Нақтыласақ, қатаң режимдегі ЗК-169/5 түзеу мекемесінде жаза өтейтін барлығы 585 сотталғанның небәрі 247-і (42,2%) Қызылорда облысының азаматтары. Ал,  255 сотталған (43,5%)  басқа өңірлердің азаматтарын құрайды. Атап айтқанда, 80-ы Оңтүстік Қазақстан, 93-і Алматы, 58-і Жамбыл, 5-і  Ақтөбе, 5-і Шығыс Қазақстан, 5-і Батыс Қазақстан, 2-і Қарағанды, 2-і Қостанай, 3-і Маңғыстау, 1-і Павлодар, 1-і Солтүстік Қазақстан облысының тұрғындары (Қалғандары шет ел азаматтарын құрайды).
Қылмыстық-атқару кодексінің 88-бабына сәйкес, егер сотталған адамның тұрғылықты жері бойынша тиісті (сәйкес) режимдегі мекеме болмаған жағдайда оны басқа облыстың мекемесіне  жіберу белгіленген. Дегенмен, қатаң режимдегі мекемелер Ақмола, Ақтөбе, Алматы, ШҚО, Жамбыл, БҚО, Қарағанды, Қостанай, Маңғыстау, Павлодар, СҚО, ОҚО, Астана қаласында қызмет атқаратынын ескеріп, басқа облыстардың азаматтарын тұрғылықты жері бойынша жаза өтеу үшін қайтаруды шешу қажет.
Жеке қабылдаулар нәтижесінде, бүгінгі күнге тұрғылықты жері бойынша жаза өтеуді сұрау туралы 42 сотталған өтініш білдіріп, бұл жұмыстар жалғасуда.
Тұрғылықты жері бойынша жаза өтеу сотталғандар мен туыстары  арасындағы әлеуметтік байланысты нығайтып, олардың түзелу жолына түсуіне ықпал жасайды.
Пікірлер жоқ. Бірінші болыңыз!

Пікір жазыңыз