«Шұғыла» мөлтек ауданында «ҚазГерМұнай» АҚ-ның демеушілігімен балалар демалыс орны ашылды. Салтанатты шараға облыс әкімі Қ.Көшербаев, ҚР Мәжіліс депутаты М.Бақтиярұлы және қала тұрғындары қатысты, деп хабарлайды облыс әкімінің баспасөз қызметі.Мұнай компаниясы 70 миллион теңге қаржыға демалыс орнын салды. Жалпы ауданы 3700 шаршы метр. Онда 11 колоннасы бар сквер, су бұрғақ, бассейн, 8 беседка, балаларға 6 ойын, үлкендерге 7 дене шынықтыру құрылғылары орнатылған. Сондай-ақ 50 көшет тал мен 132 шаршы метрге гүл отырғызылған. Бір сөзбен айтқанда балалардың демалуына бар жағдай жасалған. Аймақ басшысы бұлдіршіндердің қуанышымен ортақтасып, жылы лебізін білдірді. – Қала тұрғындарына қажетті аула, ойын алаңдары секілді нысандарды әлде де көбейтеміз. Тал егу, гүл отырғызу жұмыстары қатар жүргізіледі. Тек сіздерге айтарымыз жасалған іске жанашырлықпен қараңыздар, – деді аймақ басшысы.
