Жарық, махаббат, үміт сыйлайтын мереке

72

0

Жарық, махаббат, үміт сыйлайтын мереке Сенбі күні облыстық «Wiedergeburt» неміс этномәдени бірлестігі «Frohe Ostern» этнос күні мерекесін атап өтті. Ол неміс этносының Пасха мерекесі күніне орайластырылып өткізілді. Шараға облыс әкімінің орынбасары Руслан Рүстемов, облыстық ассамблея хатшылығының басшысы Ләйлә Төрешова, барлық этномәдени бірлестіктер мен БАҚ өкілдері қатысты.
Мерекеге орай жиылғандарды облыс әкімінің орынбасары Руслан Рүстемов құттықтады. Сонымен бірге, неміс этномәдени бірлестігінің төрайымы Ирина Шек пен өзге де жетекшілер жүрекжарды лебіздерін білдірді.
Мерекеге келгендердің құрметіне неміс пасхасын тойлаудың салты мен дәстүрі көрсетіліп, ән мен биге ұласты. Жалпы Германия елінде байырғы кезден Ostern мерекесі көктем нұрын шашқанда тойланатын болған. Оған себеп, көктем әйел жебеушісі – Osterа болған. Негізінде бұл мереке әр жыл сайын көктемнің аяғы мен сәуірдің басында жексенбі күні көктемгі күн мен түннің теңелуі мен алғашқы айдың толған кезінде аталып өтіледі.
Пасха – бұл көктем мезгілі басталуын білдіретін дәстүрлі мереке. Неміс Пасхасының ерекше белгісі өмір мен жаңа бастаудың символын білдіретін боялған жұмыртқалар, мол өнімді білдіретін пасха қояны, әртүрлі пісірілген нан және тәттілер болып табылады. Неміс этностары көктемнің шуағын шашып келген нұрлы мереке – ол жарық, махаббат, үміт және жаңару әкеледі деп сенеді.
Бұл күндері неміс отбасыларында барлық есіктер ашық болады. Үйге келген қонақтарды кеңпейілмен қарсы алып, бір-біріне бақыт, денсаулық, рухани жаңғыруды тілейді. Сондай-ақ, қоян әр жыл сайын сыйлық пен шұбар ала жұмыртқа алып келсін деп тілек білдіреді.
Мереке барысында әртүрлі ойындар, пасхалық жұмыртқалар таратылып, флешмоб ұйымдастырылды.
Пікірлер жоқ. Бірінші болыңыз!

Пікір жазыңыз