Өткен жыл еліміз үшін күрделі болды. Әлемді жайлаған пандемия біраз әлекке түсірді. Соған қарамастан, өңірде алға жылжу басым. Оны облыс әкімі Гүлшара Әбдіқалықованың облыс тұрғындарына берген есебінен көруге болады. Қай салада болмасын, еңбектің нәтижесі бар. Демек, мемлекет ұсынған мүмкіндікті билік пен халық үйлесімді жүзеге асырған.
Бір ғана мысал, «Жұмыспен қамтудың Жол картасы» аясында 40,1 млрд теңге қаржы қаралып, 291 жоба жүзеге асқан. Бұл пандемия кезінде жаңа жұмыс орындарын ашуға және халықтың әлеуметтік тұрмысын жақсартуға мүмкіндік берді. Сондай-ақ, өңірге инвестиция тарту көрсеткіші артығымен орындалып отыр.
Ауылшаруашылық саласында да оң өзгеріс бар. Мәселен, әлемнің 17 еліне ауыл шаруашылығы өнімдерінің 11 түрі экспортталған. Алғаш рет шет елге қамыс экспортқа шықты. Бұл – біздің өңір үшін жақсы жетістік. Сонымен бірге пандемия кезінде өңірдегі 54 мыңға жуық кәсіпкер салықтық жеңілдіктерін алып, 8,5 мыңнан астамы міндетті әлеуметтік медициналық сақтандыру төлемдерінен босатылды. Бұл шағын және орта бизнесті дамытуға көрсетілген қолдау деп білемін.
Жалпы аймақ басшысы айтқандай, өзге де салаларда жыл жемісі жетерлік. Мұның барлығы – жұмыстың жүйелі әрі ұтымды жүргізілуінен. Осы қарқынмен жалғасын табатын болса, биыл бұдан да жоғары көрсеткішке қол жеткізетінімізге кәміл сенемін.
Бақдәулет МАҚАШОВ,
облыстық мәслихат
депутаты
>>> Біздің Facebook, Instagram парақшаларымыз бен Telegram каналымызға жазылыңыз! <<<
