Қазіргі таңда Қазақстан Республикасы – өркениетті ел ретінде әлемге танылған мемлекет. Біздің еліміз келешегі айқын демократиялық мемлекет ретінде беделге ие және бұл жетістікке жетуімізде Елбасы Нұрсұлтан Әбішұлы Назарбаевтың тарихи рөлінің орасан зор екендігі баршамызға белгілі. Қазақстан өз тәуелсіздігінің алғашқы күнінен бастап халықаралық аренада мемлекеттіліктің жаңа сипаттағы қатынастарын қалыптастырды. Олар бейбіт қатар өмір сүру мен көпқырлы ынтымақтастықтың тең құқылық, өркениетті даму, егемендікті және аумақтық тұтастықты құрметтеу ұстанымдарына негізделген.
Қазақстан Республикасының Тұңғыш Президенті – Елбасы Нұрсұлтан Назарбаевтың саяси ерік-жігері халықтың бірлігін қамтамасыз етуге бағытталды. Бұл саясаттың өмірде іске асырылуы қоғамдық келісім мен жалпыұлттық бірліктің қазақстандық моделінде көрініс тауып, ол халықаралық тұрғыдан мойындалды.
Қазақстан Республикасының Конституциясында этносаралық және конфессияаралық қатынастар саласын реттейтін нормалар бар. Ол «біз, Қазақстан халқы» деген сөздерден басталады, бұл еліміздің барлық азаматтарының ортақ идеясын білдіру және біз біргеміз, біртұтаспыз деген қағидаға негізделген.
Қазақстан Республикасы Конституциясының 1-ші бабында Қазақстан Республикасы қызметінің негізгі принциптерінің бірі «қоғамдық татулық пен саяси тұрақтылық» деп жария етілді. Барлық азаматтардың, олардың ұлтының қандай екеніне қарамастан, құқықтары мен бостандықтарының теңдігі бекітілген. Осылайша, біздің еліміз, ең алдымен, мәдениеттердің, тілдердің, халық дәстүрлерінің алуан түрлілігін мойындай отырып, азаматтық қоғам құру жолын таңдады. Сондықтан Елбасымыз келесі қағидаттарды белгілеп берді, олар:
– Мемлекеттің мүлтіксіз дамуының, өзара сыйластық пен қоғамның жауапкершілігін сақтаудың мызғымастығы;
– Қазақстан халқының бірлігі;
– Этностық, конфессиялық, мәдени және тілдік әралуандық;
– Қазақ халқының біріктіруші рөлі;
– Барша этностарға мәдениетті, тілдер мен дәстүрлерді дамыту үшін барлық қажетті жағдайлардың жасалуы.
Осындай қағидаттар негізінде, бүгінде Қазақстанда этносаралық келісімді қамтамасыз етудің тиімді саяси-құқықтық жүйесі қалыптасты.
Қазақтың даласы қандай дархан болса, пейілі де соншалықты кең. Әлемнің түкпір-түкпірінен келіп, Қазақстаннан «басына үй, бауырына қазан» асып отырған талай халық бар. Бұл – Қазақстанның ең басты ерекшелігі мен ең басты байлығы. Қазақ халқының бауырмалдығы бүгінде әлемге үлгі. Осыны ескере отырып, Елбасы Нұрсұлтан Әбішұлы Назарбаев Қазақстан халқы Ассамблеясын құру идеясын алғаш рет 1992 жылы Қазақстан халықтарының форумында айтты.
Елбасының Жарлығымен 1995 жылы консультативтік-кеңесші орган ретінде Қазақстан халқы Ассамблеясы құрылды. 2007 жылы Ассамблеяға конституциялық мәртебе берілді. Ассамблеяға кепілді түрде парламенттік өкілдік қамтамасыз етілді, ал ол сайлайтын Мәжілістің 9 депутаты Қазақстанның этностық топтары мүдделерінің барлық жиынтығын құрады. 2008 жылы қазанда «Қазақстан халқы Ассамблеясы туралы» Заң қабылданып, Ассамблеяның қызметін нормативтік-құқықтық реттеуді қамтамасыз етті.
Ассамблея қоғамдық келісім мен бірлікке қатысты Конституция нормаларының толық, табысты және мүлтіксіз іске асырылуын қамтамасыз етеді.
Бүгінгі күні қоғамдық сананы, әлеуметтік саясатты жаңғырту міндеттерін айқындаған Қазақстан халқы Ассамблеясы дамуының 2025 жылға дейінгі тұжырымдамасы қабылданған.
Еліміздің жаңа тарихының шешуші кезеңдерінде Ассамблея әрдайым тұрақтандырушы және біріктіруші рөл атқарып келеді және еліміздегі бейбітшілік пен келісімнің шынайы кепілі болып қала беретініне сенеміз.
Бүгінде біздің облысымызда 816 мыңнан астам халық болса, оның ішінде 35 түрлі ұлт өкілдері тату-тәтті тұрмыс кешуде. Елдің ынтымағы мен бірлігін арттырып, достықтың бесігін тербетіп отырған 11 этномәдени бірлестік нәтижелі де белсенді жұмыс атқарып келеді.
Қоғамдық келісім мен жалпы ұлттық бірлікті насихаттау бойынша облыстық іс-шаралар жоспары бекітіліп, жүзеге асырылуда.
Биыл Тәуелсіздігімізге 30 жыл толады. Тәуелсіздік жылдарындағы әр күніміз, әр жылымыз ел тарихы үшін аса маңызды тарихи оқиғаларға толы болды. Оның ішінде халықаралық деңгейдегі, аумақтық сипаттағы оқиғалар тарих қойнауына еніп, бәрі де тәуелсіздіктің нәтижесі екенін көрсетті.
Тәуелсіздік алған 30 жылда қол жеткізген биігіміз, сондай-ақ алдағы алынар асуымыз, бағындырар бағытымыз туралы Мемлекет басшысы Қасым-Жомарт Тоқаев «Тәуелсіздік бәрінен қымбат» атты мазмұнды мақаласын жариялап, егемен еліміздің өсіп-өркендеу жолының ғасырға бергісіз тарихи жетістіктеріне тоқталып, мемлекетіміздің қалыптасу, даму, өркендеу жолын, «Бағдар мен белес», «Таным мен тағылым», «Қоғам мен құндылық» және «Ұлағат пен ұстаным» деп аталатын төрт ауқымды бағытты айқындап, «30 жылда біз қандай жетістіктерге жеттік?», «Келер ұрпаққа қандай елді аманаттаймыз?», «Мемлекеттігімізді нығайта түсу үшін тағы не істейміз?» деген сұрақтардың жауабын нақты көрсетті.
Президент атап өткендей, тарих тұрғысынан алғанда, 30 жыл – көзді ашып-жұмғандай қас-қағым сәт. Бұл көп халық үшін қиындығы мен қуанышы, дағдарысы мен дамуы алмасқан тұтас дәуір деуге болады. Біз де осындай жолдан өтіп келеміз.
Тәуелсіздіктің отыз жылын шартты түрде үш онжылдық белеске бөліп қарастырып: алғашқы онжылдықта Елбасымыз Нұрсұлтан Назарбаевтың басшылығымен мемлекеттік нышандарымыз белгіленіп, билік жүйеміз қалыптасты. «Қазақстан – 2030» стратегиясын қабылдадық. Екінші онжылдықта мемлекетіміздің тәуелсіздік тұғыры нығайып, экономикалық әлеуетіміз артты. Үшінші онжылдықта «Қазақстан-2050» стратегиясын қабылдап, озық дамыған 30 елдің қатарына қосылуды жоспарлап отырмыз.
Осы кезеңдерде білім, денсаулық, әлеуметтік жағдай, рухани байлығымыз, патриоттық рухымыз, еліміздің барлық салалары заман талабына сай қарқынды дамып отырды. Бұл – Елбасымыз бастап, Мемлекет басшысы жалғастырған мақсаты берік, болашағы айқын, сенімі нық қазақстандық үздіксіз даму жолымыз. Ал, енді алдағы төртінші онжылдықтағы басты міндетіміз – қуатты ел және кемел халық болу. Осы жолда ең басты бағдарымыз – білімді ұрпақ.
Мемлекет басшысы атап көрсеткендей, жас буынға жан-жақты қолдау көрсете отырып, бәсекелік қабілетін арттыруға баса көңіл бөлінетін болады. Білім мен технология, жоғары еңбек өнімділігі – ел дамуының басты қозғаушы күші болмақ.
Сондықтан, ендігі жерде рухани құндылықтарымызды нығайта отырып, Тәуелсіздігімізді баянды ету жолында аянбай еңбектенуіміз біздің әрқайсымыздың азаматтық борышымыз деп білемін.
Президент Қасым-Жомарт Кемелұлы Тоқаевтың «Тәуелсіздік бәрінен қымбат!» деген бір ауыз сөзі әрқайсысымыздың мәңгілік ұранымызға айналып, әрбір қазақстандықтың жүрегінен орын алып, рухын көтеруге жаңа серпін беретіні сөзсіз.
Тәуелсіздік жылдарында қоғамды талантымен таңғалдырған, білікті де білімді жас ұрпақ өкілдері өсіп жетілді. Сонау, тәуелсіздік алған алғашқы жылдардың өзінде, елдегі қиыншылықтарға қарамастан, Тұңғыш Президент – Елбасы «Болашақ» бағдарламасын ұсынып, талантты ұл-қыздарымызды сапалы білім алып, елімізді өркендетуге өркениетті елдердің тәжірибесін таратуда үлгі болады деген үкілі үмітпен әлемнің белгілі университеттеріне жіберді және олардың бұл күндері еліміздің әлеуметтік-экономикалық дамуына қомақты үлес қосып келе жатқаны белгілі.
Енді, Елбасының сарабдал саясатын жемісті жалғастырып, Тәуелсіздік жылдарында дүниеге келген, әлі қоғамға танылып үлгермеген талантты жастарды қолдау мақсатында «Тәуелсіздік ұрпақтары» атты грант тағайындауды тапсыруы – Мемлекет басшысының алаш ардақтысы, ұлы ақын Мағжан Жұмабаевтың «Мен жастарға сенемін…» деген жалынды жырымен үндесіп, жастардың Отанға шексіз сүйіспеншілікпен қарап, халқына адал қызмет етуіне жол ашу деп бағалауға болады.
Президентіміз Қасым-Жомарт Кемелұлы Тоқаев айтқандай, біздің мақсатымыз – келер буынға Қазақстанды тұғыры берік, экономикасы қуатты, рухы асқақ мемлекет ретінде табыстау және сол істерді лайықты жалғастыратын жасампаз ұрпақ тәрбиелеу. Ұрпақ тәрбиесімен айналысу – әрбір азаматтың қоғам алдындағы қастерлі де қасиетті парызы.
Баршамызға белгілі, Қазақстан халқы Ассамблеясының ХХІХ сессиясында Елбасымыз парасатты шешім қабылдап, Ассамблеяны басқаруды Қазақстан Республикасының Президенті Қасым-Жомарт Кемелұлы Тоқаевқа ұсынып, мемлекеттік саясаттың сабақтастығын қамтамасыз ететініне сенім білдірді. Өз кезегінде Ассамблея мүшелері Елбасы шешімін бірауыздан қолдады.
Мемлекет басшысы сессияда сөйлеген сөзінде Ассамблея – бұрын-соңды ешбір елде болмаған бірегей құрылым екеніне тоқталды. Сонымен қатар, Президент: «Біз сыйластық пен келісімнің, бауырмалдық пен өзара құрметтің негізінде еңселі ел болып отырмыз. Бұл, әрине, Елбасының арқасы. Мұны әрдайым есте ұстауымыз қажет. Әсіресе, коронавирус дерті қыспаққа алған қазіргі күрделі кезеңде халқымыздың алдында тұрған міндеттерді жүзеге асыру үшін біз бәріміз бір Ел, бір Ұлт болуымыз керек» деп тұжырымдады.
Қадірлі жерлестер, сырбойылықтар! Сіздерді алда келе жатқан Қазақстан халқының Бірлігі күнімен құттықтаймын!
Біздің тірегіміз – тәуелсіздік, тілегіміз – тұрақтылық, білегіміз – бірлік.
Еліміз әрбір отбасының бақыты мен бірлігі арқылы нығая берсін.
Қылышбай Бисенов,
техника ғылымдарының докторы, профессор,
ҚР Ұлттық ғылым
академиясының академигі,
Қазақстанның еңбек сіңірген қайраткері, Қазақстан халқы ассамблеясының мүшесі
>>> Біздің Facebook, Instagram парақшаларымыз бен Telegram каналымызға жазылыңыз! <<<
