Ақмола! Астана! Нұр-Сұлтан! Тарихтың көш-керуені алға жылжыған сайын айбаты асқақтап, көркі келбеттеніп, тұғыры бекіген қала. Тәуелсіз Қазақстанның үш онжылдықтағы қол жеткен жетістіктерінің бастауы. Еуразияның жүрегіндегі мың бояулы, миллиондаған тағдыр тоғысқан жауһар шаһар. Есілдің жағасына, Сарыарқаның төсіне шашылған інжу-маржан!
Астананы Арқа төсіне көшіру идеясы іске асқан уақытты Қазақ елінің болашақ тағдырын айқындаған тарихи кезең деп атауға болады. Қазақстанның Тұңғыш Президенті-Елбасы Нұрсұлтан Назарбаевтың әлеуметтік-экономикалық жағдайдың әлі де оңала қоймаған тұстағы бастамасы бірден қолдау таппағаны белгілі. Бірақ Елбасының табандылығы арқасында ешбір кедергіге қарамастан, Арқа төсінде шырайлы шаһар бой көтерді. Арқадағы әсем астанамызды Елбасының есімімен байланыстыруда терең мән бар.
Нұр-Сұлтан астана болғалы оның төрі адамзат баласын бейбітшілік пен келісімге, түсіністік пен толеранттылыққа үндейтін әлемдік шаралардың орталығына айналды. Сондықтан еңбектеген баладан, еңкейген қартқа дейін астананы мақтаныш етеді, оны елдігіміздің, мемлекеттігіміздің нышанындай қабылдайды.
Тарихқа аз-кем шолу жасасақ, бас қаланың тарихындағы айтулы күндер ел есінде мәңгі қалды. Елорданы Алматыдан Ақмолаға ауыстыру туралы шешімді Қазақстан Республикасы Жоғарғы Кеңесі 1994 жылы 6 шілдеде қабылдады. Астананы ресми көшіру 1997 жылғы 10 желтоқсанда жүзеге асты. Президенттің 1998 жылғы 6 мамырдағы Жарлығымен Ақмоланың атауы Астана болып өзгертілді. Жаңа астананың халықаралық тұсаукесері 1998 жылғы 10 маусымда өтті. Ал 2019 жылдың 23 наурызында қалаға Нұр-Сұлтан атауы берілді.
Бұл қала – халқымыз үшін Тәуелсіздік пен өсіп-өркендеудің алтын тұғыры. Уақыттан оза шапқан бүгінгі Нұр-Сұлтан қаласы – Тәуелсіздігіміздің бойтұмары, біртұтас еліміздің ертеңге деген үкілі үміті мен сенімінің көрінісі, арман-тілегінің орындалғанын айғақтайтын асыл мекені.
>>> Біздің Facebook, Instagram парақшаларымыз бен Telegram каналымызға жазылыңыз! <<<
