Жоғары білім берудің іргетасы Қазақстанда ХХ ғасырдың 20-30 жылдары қалана бастады. Алғашқы жиырма жылға жуық уақыт ішінде еліміздегі жоғары оқу орындарының саны 12-ге жетті.
Соның бірі корей халқын Қиыр Шығыстан жер аудару туралы КСРО Халық Комиссарлары Кеңесінің 1937 жылғы 21 тамыздағы қаулысы бойынша Қызылорда қаласына көшірілген Қиыр Шығыс Корей педагогикалық институтының негізінде құрылған Қызылорда педагогикалық институты болатын. Бүгінгі Қорқыт ата атындағы Қызылорда университетінің іргетасы осылайша қаланды.
Сыр өңірінде педагогикалық жоғары оқу орнының ашылуы сол кезеңде тарихи маңызы зор оқиға еді. Қорқыт ата атындағы Қызылорда университеті бабалардан мирас болып жеткен білім мен ғылымның бүгінгі мұрагері десек болады. Осы жылдар ішінде университет мамандар даярлауда өзіндік дәстүрі қалыптасқан іргелі жоғары оқу орнына айналды.
Қазіргі кезде университет бакалавриаттың 60, магистратураның 30, PhD докторантураның 9 мамандығы бойынша мамандар даярлайды. Университеттегі тарихы ең бай «Экономикалық теория және мемлекеттік басқару» кафедрасы 1937 жылы құрылған.
Кафедраның негізгі ғылыми бағыты – өңірдің әлеуметтік-экономикалық дамуы: мәселелері мен мүмкіндіктері. Профессор-оқытушылардың ғылыми-зерттеу жұмыстарының нәтижелері бірнеше отандық және халықаралық ғылыми басылымдарда, жоғары оқу орындарына арналған оқулықтарда жарық көрді.
Алға қойған міндеттердің бірі – ел экономикасы мен оның өңірлері, халық шаруашылығы мен оның салаларын, мемлекет пен оның аумақтық құрылымдарын басқару салаларында кәсіптік құзіреттілік пен сапалы жоғары білімді тұлғаны, заманауи жаһандық үдерістерді талдай алатын мамандарды қалыптастыру.
Білім ордасының түлектері еліміздің түкпір-түкпірінде әр салада қызмет атқаруда. Олардың арасында Қазақстан Республикасы Парламентінің депутаттары, мемлекет және қоғам қайраткерлері, Қазақстанның Еңбек Ері, Мемлекеттік сыйлықтың лауреаттары, өнер және мәдениет майталмандары, ғылым мен спорт саңлақтары бар.
Қорқыт ата атындағы Қызылорда университеті адами капиталдың құндылығын жақсартуға, ең алдымен жастардың білім деңгейін көтеріп, бәсекеге қабілетті маман даярлауға аса мән береді. Алдағы уақытта да бұл құрметті миссияны абыроймен атқаратынына сенімдімін.
Қамар БЕКЕТОВА,
экономика ғылымдарының кандидаты, қауымдастырылған
профессор
>>> Біздің Facebook, Instagram парақшаларымыз бен Telegram каналымызға жазылыңыз! <<<
