облыстық мемлекеттік архивтің ұйымдастыруымен ҚР Конституциясы күніне орай «Ұлық тұтар ұлы заң» тақырыбында онлайн кездесу өтті.
Қоғам мен мемлекетті жаңғыртудағы Ата заң ролін терең ұғыну, заңнамалық қағидаларын кеңінен насихаттауды мақсат еткен іс-шараға «Nur Otan» партиясы Қызылорда қалалық филиалының, аймақтың жоғары оқу орындарының, архив және оның филиалдарының қызметкерлері қатысты.
Кездесуде облыстық мемлекеттік архив басшысы Жанат Абзалиева Конституция – кез келген мемлекеттің тәуелсіздігін, демократиялық құндылықтарын айқындайтын негізгі құжат екендігін және мемлекет пен оның азаматтарына мінсіз қызмет ететіндігіне тоқталып, қатысушыларды мерекемен құттықтады.
– Қазақ елі тәуелсіздік алып, өз Конституциямызды қабылдағанымызға биыл 26 жыл толып отыр. Ата Заң біздің мемлекетіміз бен оның азаматтарына мінсіз қызмет етіп келеді. Осы жылдар ішінде заңның, адамның құқығы мен бостандығының берік кепілі – еліміздің Президентінің бастамасы бойынша Конституцияға екі мәрте өзгертулер мен толықтырулар енгізілді. Бұл Конституцияның біздің өміріміздің барлық қырларына тереңірек бойлай және әрі қарай дамуға ықпал ете отырып, жас Қазақстанмен бірге өсіп- өркендеп келе жатқанын білдіреді, – деді ол.
Кездесу барысында облыстық мемлекеттік архивінің палеографы Әсел Байменова «Ата заң – алтын тұғырымыз» тақырыбында баяндама оқыды. Сондай-ақ, облыстық жоғары медициналық колледжінің тарих пәні оқытушысы Эльмира Нұрпейісова еліміздегі ең алғашқы Конституцияның негізін қалаушы – Қорқыт атадан бастап, тарихқа шолу жасап, Қасым ханның «Қасқа жолы», Есім ханның «Ескі жолы», Тәуке ханның «Жеті жарғысы» туралы, 1995 жылғы 30 тамызда өткізілген бүкілхалықтық референдум нәтижесінде қабылданған Қазақстанның жаңа Конституциясына дейінгі тарихына тоқталды. Қазанғап атындағы Қызылорда музыкалық жоғары колледжінің тарих пәнінің оқытушысы Гүлшат Қосжанова Ата заңның ел өміріндегі орны өлшеусіз екендігін, оның құрылымы, атқаратын қызметтері туралы айтты.
Іс-шара соңында қатысушылар конституциялық құндылықтар, Қазақстанның заңнамасы және оларды жүзеге асыру жолдары төңірегіндегі құқықтық мәселелерге тоқталып, өзара пікір алмасты.
Б.Сағындықұлы
>>> Біздің Facebook, Instagram парақшаларымыз бен Telegram каналымызға жазылыңыз! <<<
