Қадірлі сырбойылықтар!
Күн менен түн теңеліп, Жер-Ана жаңа күйге еніп, тіршілік атаулы оянып, айнала мәре-сәре болатын Ұлыстың ұлы күні – жыл бастауы әз Наурыз баршаңызға құтты болсын!
Ежелден барша түркі жұртына және Шығыс халқына ортақ, бесмыңжылдық тарихы бар Наурыз мейрамы – береке мен бірліктің, молшылық пен тоқшылықтың мерекесі.
Бұл күнге де аман-есен жеттік деп қуанған халық бір-бірімен қуана көрісіп, өкпе-ренішті ұмытып, бір қазаннан Наурызкөже ішіп, тойлатқан.
Бұлақтың көзін ашып, ағаш отырғызып, егін салды. Қыстан қысылып шыққан ағайынға дем беріп, қайырымдылық көрсетті.
Бүгінгі күні де осы дәстүрлеріміз ұмытылмай, керісінше, қайта жаңғырып, жанданып келеді.
Ел өміріне түбегейлі өзгеріс әкелген осы жылдан бастап тәуелсіз Қазақстан дамудың жаңа жолына түсті. Наурыз айында Мемлекет басшысы Қасым-Жомарт Кемелұлы Тоқаев Қазақстан халқына «Жаңа Қазақстан: Жаңару мен жаңғыру жолы» Жолдауын арнауы еліміздің жаңа тарихи кезеңінің төл жаңа жылымыздан басталғанын көрсетті. Осылайша, Наурыз мейрамы тәуелсіз Қазақстанымыздың жаңғыруымен сабақтасып жатқандай.
Қазіргі таңда Наурыз мейрамын тойлаудың басты мақсаты – қоғамды біріктіру, қазақ халқының ұлттық бірегейлігі мен мәдени ерекшелігін сақтау және насихаттау үшін жағдайлар жасау. Ол – жаңару идеясына негізделген, үлкен идеологиялық әлеуетке ие мереке ретінде отбасы мен қоғамды біріктіретін құндылықтарды нығайтуға бағытталған.
Ардақты ағайын!
Екі жылдан бері әлемді жаулаған пандемия салдарынан Наурыз мейрамын кең ауқымда атай алмай келдік. Биыл енді індеттің беті қайтып, бәріміз емен-жарқын тойлауға мүмкіндік алдық.
Ұлыстың ұлы күні – әз Наурыз елімізге тыныштық, жерімізге молшылық, әрбір отбасына бақ-береке, ырыс-құт әкелсін деп тілеймін!
Ұлыс оң болсын, ақ мол болсын!
Наурыз құтты болсын!
Құрметпен,
облыс әкімі
Гүлшара Әбдіқалықова
>>> Біздің Facebook, Instagram парақшаларымыз бен Telegram каналымызға жазылыңыз! <<<
