Қалалық орталықтандырылған кітапханалар жүйесі қалалық мәдениет бөлімінің қолдауымен 2 сәуір – Халықаралық балалар кітабы күнін ағартушы-педагог Ыбырай Алтынсариннің 185 жылдығымен бірге атап өтті. «Ертегімен есейем» жобасы аясында «Білімнің жаққан шырағын» атты қалалық көркемсөз және сахналық қойылым байқауын ұйымдастырды.
Негізгі мақсаты – оқушылардың кітап оқуға деген қызығушылығын арттыру.
Сайысты Қызылорда қалалық мәдениет және тілдерді дамыту бөлімінің басшысы Айдын Қайруллаев ашты. Оған қала аумағынан бес мектептің 5-сынып оқушылары қатысып, бақ сынады. Байқауға оқушылар сақадай сай, жоғары дайындықпен келген. Олар «Ғибратты әңгімелер» атты бірінші кезеңде Ы.Алтынсариннің әңгімелерінен сахналық көрініс көрсетті. Екінші кезеңде ағартушының жырларын жатқа мәнерлеп оқыды.
Аталған жарысқа «Қоғам ТВ» телеарнасының шеф редакторы Баян Құлтанова, Ә.Тәжібаев атындағы облыстық әмбебап ғылыми кітапхананың әдіскері Венера Жұбаниязова, қалалық мәдениет үйлері, клубтар және халықтық ұжымдар мекемесінің көркемдік жетекшісі Ұлықбек Бекұзақұлы төрелік етіп, шын жүйріктерді анықтады. Әділқазылар оқушылардың мәнерлеп оқуына, сөйлеу мәнеріне, актерлік шеберлігіне, таңдап алынған шығарманың мазмұнына ерекше мән берді.
Екі кезеңнің нәтижесі бойынша бас жүлдені Н.Ілиясов атындағы №9 мектеп-гимназиясының оқушылары жеңіп алды. І дәрежелі дипломды С.Лапин атындағы №261 орта мектебі, ІІ дәрежелі дипломды Ә.Мүсілімов атындағы №101 мектеп-лицейі иеленді. ІІІ дәрежелі диплом Б.Ермекбаев атындағы №271 орта мектебі мен Б.Момынбаев атындағы №278 ІТ мектебіне бұйырды.
Сонымен қатар «Көрермен көзайымы» номинациясымен Жанайым Ерболат, «Жас талант» номинациясымен Балнұр Құрманғазы, «Ең белсенді қатысушы» номинациясымен Мағжан Іскендір марапатталды. Ұйымдастырушылардың еңбегі айқын көрініп, шара мазмұны балалардың жас ерекшелігіне сай, тартымды әрі тәрбиелік мәнге толы болды.
Осындай игі бастамалар өскелең ұрпақты кітап оқуға баулуда маңызды рөл атқаратыны сөзсіз.
«СБ» ақпарат
