Қорқыт ата атындағы Қызылорда университетінде Қазақстанның еңбек сіңірген қайраткері, жырау, өнертанушы, профессор Алмасбек Алматовтың 70 жылдық мерейтойына арналған Ғылыми кеңестің кеңейтілген салтанатты мәжілісі өтті.
Мерейтойлық жиынды университет ректоры Наурызбай Байқадамов ашып, ғалымның ұлттық өнер мен руханият саласындағы еңбегіне тоқталды. Қазақтың жыраулық дәстүрін жаңғыртып, ғылыми тұрғыда зерттеп, оны білім беру жүйесіне енгізуге елеулі үлес қосқанын атап өтті.
Ғалым университет тарихында алғаш рет «Дәстүрлі өнер – жыр» мамандығы бойынша «Дәстүрлі музыкалық өнер» кафедрасының негізін қалап, алғашқы меңгерушісі болды. Оның бастамасымен ұлттық жыраулық дәстүрді зерттеу, жүйелеу және жас буынға үйрету бағытында бірқатар жұмыс атқарылды.
Салтанатты жиында Алмасбек Нұрмаханұлына Қорқыт ата атындағы Қызылорда университетінің құрметті профессоры аттестаты табысталды.
Мерейтойлық жиынға жазушы, тарихшы-этнограф Қойшығара Салғараұлы, Қазақстанның Халық жазушысы Жүрсін Ерман, Парламент Мәжілісінің депутаты Жанарбек Әшімжан, академик Қылышбай Бисенов және мәдениет пен өнер саласының өкілдері қатысты. Сонымен қатар университеттің профессор-оқытушылары мен Ғылыми кеңес мүшелері де жиналды.
Қонақтар мерейтой иесінің шығармашылық жолы мен ғылыми еңбектеріне тоқталып, қазақ руханияты мен дәстүрлі өнерді дамытудағы еңбегін ерекше атап өтті. Талантты шәкірттер тәрбиелеп, жыраулық мектептің қалыптасуына ықпал еткеніне тоқталды. Жазушы, тарихшы-этнограф Қойшығара Салғараұлы өз сөзінде Алмасбек Алматовтың жыраулық өнердің сабақтастығын сақтаудағы еңбегін жоғары бағалады. Шара барысында Алмасбек Алматовтың шәкірттері мен жас өнерпаздар жырдан шашу шашып, ұстазға құрмет көрсетті.
Сондай-ақ ғалымның көп томдық шығармалар жинағының тұсаукесері өтті.
Кездесу соңында мерейтой иесі сөз сөйлеп, көрсетілген құрметке алғысын білдірді.
Ғазиза ӘБІЛДА,
Бағлан АМАНЖОЛ,
«Сыр бойы»
