АҚШ-тың қарапайым тұрғыны, үш баланың анасы, белсенді әлеуметтік желі қолданушысы, балалар сайтының негізін қалаушы Эмми Бродмур балаларға кітап сыйлау бастамасын көтерген екен. Көп ұзамай бұл бастама көпшілік арасында қызу қолдау тауып, Халықаралық кітап сыйлау күні пайда болды.
«Адамдар бір-біріне тек кітап сыйлап қана қоймай, әлеуметтік желіде кітаптардың тарихын әңгімелеп, суреттерін бөліседі. Осылайша жылдан-жылға жобаны қолдаушылар қатары артып келеді» деп жазыпты жоба авторы.
Иә, расында ең әуелі балаларға кітап сыйлап, қуантуды мақсат еткен бұл жоба осылайша он бес жылға таяу мерзім ішінде жалпыға ортақ сипат алды. «Кітап сыйлау күні» әлемнің әр түкпірінде аталып өткен сайын қаншама туынды өз оқырманын тауып, көңілдерге қуаныш ұялатады.
Балалар үшін кітап оқудың қаншалықты маңызды екенін алысқа ұзамай-ақ, өз өмір жолымыздан баяндасақ, біздің ой-санамыздың қалыптасуына Алпамыс, Қобыланды, ер Тарғын батырлар жайлы жазылған эпостық жырлардың әсері ерекше болды. Қалай дейсіз бе? Айталық, армандауды, қиялдауды үйретті, жақсылыққа ұмтылып, әділдікті қолдап, қиындықты жеңе білуге жетеледі.
Халықаралық кітап сыйлау күнінде жыл сайын облыстағы Ә.Тәжібаев ғылыми кітапханасы бастаған барлық кітапханаларда арнайы іс-шаралар ұйымдастырылып, кітап сыйлау қарқынды жүргізіледі. Іс-шараға жалпы көпшілік қатысады.
Ғазиза ӘБІЛДА,
«Сыр бойы»
