Республикалық қоғамдық-саяси газет «Жас Алаштың» жарыққа шыққанына 100 жыл толып отыр.
Тарихқа көз салсақ, басылымның алғашқы саны 1921 жылдың 21 наурызында араб әліпбиінің төте жазу нұсқасымен Ташкент қаласында жарық көрген. Газеттің тұңғыш редакторы, біздің жерлесіміз Ғани Мұратбаев, жауапты хатшысы ақын Ілияс Жансүгіров болған.
Бұл басылым – кеңестік дәуірде «Лениншіл жас» атауымен шығып тұрған кезеңде де ұлттық тұғырдан үн қата білген, халық сүйіктісі болған сөз отауы. Атақты Шерхан Мұртаза басшылық жасап тұрған жылдары қазақтың Ақселеу Сейдімбеков, Фариза Оңғарсынова, Мұхтар Шаханов секілді марқасқалары еңбек еткен. Осындай тау тұлғалардың қолтаңбасы бар газет өзінің ақиқатшыл, айбыншыл бағытынан ешқашан айныған емес.
Басылымның 100 жылдық мерейтойы қарсаңында байтақ еліміздің байырқалы оқырманымен жүздесуді мақсат тұтқан шығармашылық ұжым мерейтойлық сапарын Қызылорда өңірінен бастады. Әуелі аудандарда болған газеттің бас редакторы Қайрат Мәтіреков, қоғам қайраткері, саясаткер Дос Көшім, газеттің жауапты хатшысы Нұрымжан Мауытов, Миуа Байназарова кеше «Сыр медиа» ұжымында болып, бір топ журналиспен кездесті.
Кездесуде облыстық ішкі саясат басқармасы басшысының орынбасары Руслан Каюпов алғысөз айтып, әріптес қонақтарымызды жақын таныстырып өтті.
Мұнан соң басылымның бас редакторы Қ.Мәтіреков сөз сөйлеп, газет тарихына тоқталды. Сапар барысында ел ішінің «Жас Алашқа» деген ыстық ықыласын, жақсы бағасын сезінгенін, газеттің халық мүддесін айтудан еш танбайтынын, тұлғалар салған сара жолмен жүре беретіндіктерін жеткізді.
Ал, саясаткер, газеттің тұрақты авторы Дос Көшім басылымның негізгі бағыт-бағдарына шолу жасады. Баспасөз маңыздылығын, оның қоғамдағы ролін саралады.
Облыстық мәслихат депутаты, «Сыр медиа» ЖШС бас директоры, Қазақстан Журналистер одағы облыстық филиалының төрағасы Аманжол Оңғарбаев әріптестерімізді ғасырлық мерекемен құттықтап, қонақтарға сәт сапар тіледі.
Журналистер әріптестеріне «Газетті алты Алаш дәрежесіне көтере алуға бола ма, материалдық мүмкіндіктеріңіз қалай?» деген сияқты сұрақтар қойды. Қазіргі кездегі тілдік қалыбымыздың бұзылып бара жатқанын, осы тұрғыда ащы пікірлер мен мақалалар жариялауды ұсынды. Газет редакторы бұл сауалдарға тұшымды жауап айтты.
Кездесу еркін реңкте, ашық сұхбатта өтті.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
