Тәулік бойы қызмет ететін Қызылорда қалалық ішкі істер басқармасының Жедел басқару орталығы қоғамдық қауіпсіздікті сақтау, қылмыстарды ашу, әкімшілік құқық бұзушылықтарды анықтау бағытында аса маңызды қызмет атқарады.
Қандай да бір шағымы немесе наразылығы бар облыс тұрғындары ең алдымен кезекші бөлімге хабарласып, араша сұрайды. Онда тіркеп алу ғана емес, қылмысты жедел ашу үшін полицияның кешендік күшін тиімді пайдалану, алғашқы тергеу жұмысын сапалы жүргізу жұмыстары толыққанды ұйымдастырылып отыр. Мәселен, түскен хабарламаны қабылдаған кезекші жедел жоспарлау орталығына жолдап, жедел тергеу тобы тез арада оқиға орнына жетеді.
ОІІД баспасөз қызметі хабарлағандай, қызметтің тиімділігін арттыру мақсатында әскери-қызметтік дайындық аясында жауапты кезекшілер мен Жедел басқару орталығы операторларының кезекшіліктен тыс уақытта оқиға орнына баруы тәжірибеге енгізілді. Оқиға орнына барған кезекшілер полиция наряды, учаскелік полиция инспекторлары мен жедел тергеу тобының құқық бұзушылықтарды рәсімдеу барысымен етене танысуына мүмкіндік алады. Ауысым соңынан кезекшілер атқарылған жұмысты қорытындылап, департамент бастығының орынбасарына есеп береді, басшылық өз кезегінде кезекшілердің қызметіне баға беріп, оның кәсіби деңгейін арттыруға ұсыныстар енгізеді.
Осы жылдың 1-6 қыркүйек күндері аралығында Қызылорда ҚІІБ Жедел басқару орталығының «102» арнасына азаматтардан келіп түскен полицияның құзырына жататын хабарламалардың саны – 514 болса, оның ішінде қылмыс құрамы бар – 74, әкімшілік құқық бұзушылықтар – 219, басқа да хабарламалар – 214 болып отыр. Күнделікті келіп түскен хабарламалар, оның ішінде қылмыс пен құқық бұзушылықтар талдауға алынады.
Жалпы полиция қызметіне енгізілген жаңа өзгерістер оң нәтиже беруде. Біріншіден, полиция қызметкерлерінің кәсіби деңгейі, жұмыстың тиімділігі артса, екіншіден халықпен сенімді байланыс орнату тетіктері нығайып отыр.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
