Кәсіпкерлер палатасының заңгері Салауат Құлмахан сотта кәсіпкердің мүддесін білдіре қатысып, нәтижесінде кәсіпкер 4 млн 949 мың теңге қаржысын үнемдеп қалды және, ең бастысы, мемлекеттік сатып алуда «жосықсыздықтан» құтқарылды. Бұл туралы облыстық кәсіпкерлер палатасының баспасөз қызметі хабарлады.
Облыстық мамандандырылған ауданаралық экономикалық сотында облыстық құрылыс, архитектура және қала құрылысы басқармасы тарапынан «Мұнай құрылыс» көпсалалы құрылыс фирмасы» ЖШС-н мемлекеттік сатып алуда жосықсыз қатысушы деп тану, сондай-ақ жұмыстарды толық аяқтамады деген желеумен 5 110 560 теңге айыппұл төлету туралы талабы қаралды.
2017 жылы «Мұнай құрылыс» компаниясы мемлекеттік сатып алу конкурсына қатысып, «Сырдария ауданы, Ақжарма ауылында спорт кешенінің құрылысын салу» лотын ұтып алады. Жоба құны – 189 млн 280 мың теңге. Орындау мерзімі 2018 жылдың 13 шілдесі.
Кәсіпкер жұмыстардың негізгі бөлігін бітіріп, тек 9 464 005,7 теңгенің құрылыс жұмыстарын объективті себептерге байланысты уақытылы тапсыра алмаған.
Бірінші себеп – ауа райының қолайсыздығы. «Казгидромет» РМК филиалының мәліметінде 2018 жылдың наурыз, сәуір айлары жауын-шашынды болған. Бұл жағдай құрылыс жұмыстарын жүргізуде айтарлықтай кедергі келтіреді. Себебі спорт кешенінің конструкцияларын жинау барысында технология сақталу қажет, яғни металл құрылымдары қылдан, кірден, майдан, тот пен ылғалдан, мұздан және қардан таза болуы қажет. Осы технологиялық процестерді сақтау үшін кәсіпкер тарапынан сметалық жобада көрсетілген жұмыстар талапқа сай атқарылған.
Екінші себеп, Ақжарма ауылдық округінде электр желілері, электр бағаналары мен трансформаторларды толық ауыстыру жұмыстарының жүргізілуіне байланысты күніне 3-4 сағатқа дейін электр энергиясын беру тоқтатылған. Бұл жағдай да құрылыс жұмыстарына кері әсерін тигізген.
Сотта облыстық құрылыс басқармасы тұрақсыздық айыбын жалпы сомадан алып есептеп, 5 110 560 теңгені өндіруді талап етеді. Палата заңгері барлық жұмыстардың дер кезінде бітіріліп, 2018 жылдың 5 маусымына дейін 179 815 994 теңге қаржы аударылғандығын, кәсіпкер тарапынан тек 9 464 005 теңгенің міндеттемелері 17 күнге кешіктіріліп тапсырылғандығын, тұрақсыздық айыбын осы сомаға және сол мерзімге есептегенде 160 888 теңгені құрайтынын дәлелдеп шықты.
Қос тараптың уәждерін тыңдаған сот облыстық құрылыс, сәулет және қала құрылысы басқармасының талап арызын ішінара қанағаттандырады. Нақты айтқанда, кәсіпкерге 160 888 теңге тұрақсыздық айыппұлын және 4827 теңге мемлекеттік бажды төлеуді міндеттеп, басқарманың кәсіпкерді мемлекеттік сатып алудың жосықсыз қатысушы деп тану туралы талабын қанағаттандырусыз қалдырды.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
