Тараз қаласы әкімдігіне қарасты мекеме 6 қызметкерге заңсыз жалақы төлеп келген. Қылмыстық іс қозғалды, деп хабарлайды ҚазАқпарат ҚР Қаржы министрлігі Ішкі мемлекеттік аудит комитетіне сілтеме жасап.
Жамбыл облысы бойынша Ішкі мемлекеттік аудит департаменті 2021 жылдың сәуір айында ҚР Сыбайлас жемқорлыққа қарсы іс-қимыл агенттігінің Жамбыл облысы бойынша департаментінен түскен арызына сәйкес, «Тараз қаласы әкімдігінің тұрғын жай-коммуналдық шаруашылық, жолаушы көлігі және автомобиль жолдары бөлімінің «Жамбыл-Су» шаруашылық жүргізу құқығындығы мемлекеттік коммуналдық кәсіпорнында жалақыны есептеу мен төлеудің заңдылығына жоспардан тыс тексеру жүргізді. Нәтижесінде 2020 жылдың тамызынан бастап 2021 жылдың ақпанына дейінгі аралықта жұмысқа заңсыз қабылданған және өз қызметтік міндеттерін орындамаған кәсіпорынның 6 жұмысшысына көлемі 6 718,9 мың теңгеге жалақы заңсыз есептеліп, төленгені анықталды.
Олар үшін ай сайын жалақыны персоналды басқару бөлімінің мамандары, бухгалтері және кәсіпорынның бас экономисі алып келген», – делінген ақпаратта.
Мәлім етілгендей, тексеру барысында заңсыз алынған қаражатты, яғни 1 582,0 мың теңгені бухгалтер кәсіпорынның кірісіне қайтарған.
«Жүргізілген аудит материалдары Сыбайлас жемқорлыққа қарсы іс-қимыл агенттігінің Жамбыл облысы бойынша департаментіне жіберілді.
2021 жылғы 29 сәуір айында аталған департамент тарапынан қылмыстық іс қозғалды», – деді Жамбыл облысы бойынша Ішкі мемлекеттік аудит департаментінің басшысы А.Дүйсенбаев.
>>> Біздің Facebook, Instagram парақшаларымыз бен Telegram каналымызға жазылыңыз! <<<
