Облыс әкімі Нұрлыбек Нәлібаев Сыр өңіріне өнер сапарымен келген Қазақстанның Халық артисі Роза Рымбаеваның сахнадағы 50 жылдығына арналған шығармашылық кешін тамашалады.
Кешке ҚР Парламенті Мәжілісіндегі «AMANAT» партиясы фракциясының жетекшісі Елнұр Бейсенбаев, Парламент Мәжілісінің депутаты Мархабат Жайымбетов, Мәжілістегі «AMANAT» партиясы фракциясы аппаратының басшысы Мадина Қадырова, облыстық мәслихат төрағасы Наурызбай Байқадамов, ардагерлер мен зиялы қауым өкілдері келді.
Сахнадағы жартығасырлық мерейлі белесіне орай сырбойылық көрерменімен қауышқан Роза Қуанышқызы ұлдары Әли және Мәдимен бірге репертуарындағы танымал әндерін айтып, көрерменнің ыстық ықыласына бөленді. Қызылордалықтар әншінің орындауындағы «Атамекен», «Отандастар», «Өткен күн», «Неге жалғыз?» шығармаларын тыңдап, ерекше қошемет көрсетті. Өйткені, Халық артисінің шығармашылығы мен қазақ әнінің тұтас дәуірі бір-бірімен тығыз байланысты.
Концертте Роза Рымбаева жерлесіміз, танымал музыкант Батырхан Шүкеновтің құрметіне оның әндерін орындады.
Отандық эстраданың ең танымал әншісі 22 жасында Қазақ КСР-нің еңбек сіңірген артисі, 29 жасында Қазақ КСР-нің Халық артисі атанған. Еліміздің атын, ұлтымыздың болмысын, музыкалық талғамын әлемге танытқан. Роза Қуанышқызының 1977 жылы Болгарияда өткен «Золотой орфей» фестивалінің бас жүлдесін жеңіп алуы сол кезеңдегі қазақ ән өнерінің ғана емес, Кеңес одағы мәдениетінің ең үлкен жетістігі еді. Әншінің талантын мойындаған бауырлас қырғыз бен өзбек ағайындар Роза Қуанышқызына өз республикаларының Еңбек сіңірген артисі атағын берді. Ол тәуелсіз еліміздің «Құрмет», «Парасат» ордендеріне ие болып, Қазақстанның Еңбек Ері атанды.
Концертте әншіге аймақ басшысының ықылас гүлі ұсынылды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
