Кеше облыс әкімі Нұрлыбек Нәлібаев кезектілік тәртібімен азаматтарды қабылдап, олардың ұсыныс-пікірлерін тыңдады. Бұл жолы жеке қабылдауға
10 адам келді. Бұл туралы облыс әкімінің баспасөз қызметі хабарлады.
Қабылдауға жазылғандарды толғандыратын түйткілдердің негізгілері – тұрғын үй алу, жол, жарықтандыру, жұмысқа орналасу және кәсіп ашу.
Облыс әкімі қабылдауға келушінің әрбірінің қойған сауалы жіті зерттелетінін айтты. Шешімін қарастыруда ең алдымен заң талаптары ескеріліп, негізге алынады. Кейбір сұрақтар бойынша жауапты тұлғалар сол жерде заң аясында түсіндірме беріп, шешу жолдарын ұсынды.
81 жастағы қала тұрғыны «Абзал и К» ТС маңындағы 4 көшеде жарық, су, асфальт, ойын алаңы жоқ екенін және тазалық мәселесін қозғады. Қала әкіміне аталған шағын ауданға барып, жағдаймен жіті танысу жөнінде тапсырма берілді.
Саяжай аумағының 58 жастағы тұрғыны қалаға қатынаудың қиындығын алға тартып, тұрақты қоғамдық көлік маршрутын ұйымдастыруды сұрады. Оның өтініші бойынша таңертең және кешкі уақытта арнайы бағыт ашылатын болды.
Ал әлеуметтік көмек сұрап келушілерге бұл мәселені арнайы комиссия заң аясында қарайтыны айтылды.
Еске салайық, тұрғындар облыс әкімінің қабылдауына egov.kz порталы, е-otinish бірыңғай базасы немесе әкімдікке келіп жазбаша өтініш тастау арқылы жазыла алады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
