«Жас Отан» жастар қанатының Қызылорда облыстық филиалы мен облыстық жастар ресурстық орталығының ұйымдастыруымен «Nur Оtan» партиясының «Ардагерлерді ардақтайық» жобасы аясында қамқорлық айы жарияланбақ.
Бұл туралы өңірлік коммуникациялар қызметінде «Жас Отан» жастар қанатының облыстық филиал төрағасы Талғат Тілес және облыстық жастар ресурстық орталығының директоры Абылайхан Сабанбаев мәлімдеді.
«Ұрпақ тағзымы» атты қамқорлық айында Ұлы Отан соғысы, тыл және еңбек ардагерлері, жалғызбасты қарттар мен мүгедектерге жастар тарапынан барынша қамқорлық жасалмақ. Сондай-ақ, осы айда өңірімізде Ұлы Отан соғысы батырларының есімі берілген 25 көше мен 18 ескерткішке тазалау, әрлеу жұмыстары да жүргізілмек.
«Бүгіннен басталған шара мамыр айының 19-на дейін жалғасады. Шара барысында 30 Ұлы Отан соғысы, 240 тыл ардагеріне көмек көрсететін боламыз. Бұл шараға денсаулық және әлеуметтік саланың мамандары да қатысады. Акция аясында «Instagram», «VK» әлеуметтік желілерінде «Қаһарманмен селфи» челленджі іске асырылады. Жастар қарт майдангерлермен бірге суретке түсіп, әлеуметтік желілерге жариялайды. Облыс бойынша бұл акцияға 1500 жас қатысады» деді шараны ұйымдастырушылар.
Жастарды ізгілікке, үлкенді сыйлауға, мұқтажға көмек көрсетуге тәрбиелейтін бұл шараның мәні зор.
Гүлмира ДІЛДӘБЕКОВА.
>>> Біздің Facebook, Instagram парақшаларымыз бен Telegram каналымызға жазылыңыз! <<<
