«Аманат» партиясы облыстық филиалының атқарушы хатшысы Ләйлә Төрешова «Тағзым» алаңында өткен «Ұлы Жеңіс – ұрпаққа аманат» атты салтанатты шараға қатысып, майданда ерлік көрсеткен батырлардың құрметіне гүл шоқтарын қойды.
Мұнан соң ҰОС ардагерлері Әбдірахман Бәйтіков пен Төлеген Жүнісовтің шаңырағына барып, қарт жауынгерлерді мерекемен құттықтап, сый-сияпат көрсетті.
Алдағы жоспармен танысты
Партияның «Ұлттық мұра» жобасы аясында филиалдың атқарушы хатшысы Ләйлә Төрешова «Жыраулар үйінде» болып, өнер ордасының алдағы жоспарымен танысты.
Ұлттық мұрамыз – жыраулық өнерді кеңінен насихаттауда партия филиалы жанындағы «Miras» азаматтық қоғам мен мәдениетті дамыту жөніндегі аймақтық кеңесімен бірлесе белсенді жұмыстар атқаратынын атап өтті. Сондай-ақ фонотекалық қорға «Қазақтың халық әндері» анталогиясын сыйға тартты.
«Қарызсыз қоғамның» оқулары жалғасады
«Қарызсыз қоғам» жобасы өз тиімділігін көрсетіп, жалпыхалықтық бағдарламаға айналды.
Биыл жоба аясында 8000 азаматты қаржылық сауаттылық оқу курсынан өткізу жоспарланған. Бүгінгі күнге Қызылорда қаласы мен Сырдария, Жалағаш, Шиелі, Жаңақорған аудандарының 2500-ге жуық тұрғыны білім алды. Мамыр айының 13-нен бастап Арал және Қазалы аудандарында екі ай бойы аптасына 2 топпен және Қызылорда қаласында әдеттегідей 1 топпен жұмыс жүргізілетін болады.
Бірлескен отырыс өтті
Партия филиалы жанындағы партиялық бақылау комиссиясы мен сыбайлас жемқорлыққа қарсы іс-қимыл жөніндегі кеңестің бірлескен отырысы өтті.
Мемлекет басшысының Жолдауында айқындалған бағыттардың бірі – мемлекеттік сатып алудың жаңа жүйесін енгізу, қазіргі жүйенің проблемаларын жою. Отырыста мүгедектігі бар азаматтар құрған қоғамдық ұйымдардың тауарларын, қызметтерін мемлекеттік сатып алу кезінде индустриялық сертификат талап ету бойынша ұсыныстар жан-жақты талқыланды.
«Шешім» кітабының тұсаукесері
«Кітап-AMANAT» орталығында бірнеше жыр жинақтары мен прозалық кітаптардың авторы, ақын, Халықарылық «Алаш» әдеби сыйлығының лауреаты, Қазақстан Телерадио академиясының «Алтын жұлдыз» иегері, Қазақстанның Құрметті журналисі Қаршыға Есімсейітованың «Шешім» атты кітабының тұсаукесер рәсімі өтті.
Шараны партияның облыстық филиалы атқарушы хатшысының орынбасары Алтынбек Жарылқасынов жүргізіп, «Кітап-AMANAT» жобасы мен орталықтың негізгі жұмысын атап өтті.
Партиялық жобалар ізімен
Партияның аумақтық филиалдары және «Жастар рухы» Жастар қанаты түрлі бағытта 20-ға жуық іс-шара ұйымдастырды. Мәселен, Шиелі аудандық филиалы жанындағы партиялық бақылау комиссиясы «Кедергісіз келешек» партиялық жобасы аясында бірқатар әлеуметтік нысанның мүмкіндігі шектеулі жандар үшін бейімделуіне мониторинг жүргізді.
Мониторинг барысында кейбір мекеме басшыларына анықталған кемшіліктерді жою жөнінде ұсыныстар берілді. Сонымен қатар Сайлауалды бағдарлама аясында «Тұран» ауылдық округі, «Самара-Шымкент-Қодаманов» автожолының К-3 коллекторындағы көпір құрылысына партиялық бақылау жасады.
«Жастар рухы» ЖҚ Қазалы аудандық филиалы партияның «Qaisar» әскери-патриоттық жобасы аясында жастардың бойындағы Отанға деген сүйіспеншілікті арттыру, әскери-патриоттық рух қалыптастыру, азаматтарды Отан алдындағы борышын өтеуге шақыру мақсатында Қазалы көлік-техникалық жоғары колледжінде кездесу өткізді. Шараға аудан әкімінің орынбасары Дәурен Тілеуімбетов, аудандық қорғаныс істері бөлімінің бастығы Нұрлан Құлбаев қатысты.
>>> Біздің Facebook, Instagram парақшаларымыз бен Telegram каналымызға жазылыңыз! <<<
