Қызылорда қаласындағы «Локомотив» стадионында футболдан 2013-2014 жылдары дүниеге келген жасөспірімдер арасында ішкі істер саласының ардагері Мейірбек Досымовты еске алуға арналған облыстық ашық турнир өтті. Оған облыс орталығы мен бірқатар ауданнан 10 команда қатысты.
Жарыстың ашылу салтанатында облыстық дене шынықтыру, спорт және туризм басқармасы басшысының орынбасары Жігер Айекешов жас өрендерге сәттілік тіледі. Сондай-ақ әріптестері, достары және туыстары ардақты азамат жөнінде естелік әңгімесін айтты.
– Мейірбек саналы ғұмырында құқық қорғау саласында жемісті еңбек етті. 1980 жылы Алматы қаласында политехникалық институттың тау-кен факультетін бітіргеннен кейін аздаған уақыт мамандығы бойынша еңбек етті. Содан кейін құқық қорғау саласына ауысып, ұзақ уақыт бойы қоғамдық қауіпсіздікті сақтау бойынша халыққа қалтқысыз қызмет етті. Ол өзінің өмір жолында жастарға үлгі боларлық істер атқарды, ағайын-туыс пен әріптестері арасында зор абыройға кенелді. Сондықтан ардақты азаматтың жарқын бейнесі жадымыздан өшпейді деуге толық негіз бар. Оның футболға қызығушылығы бар еді, – дейді досы Мақсұт Жайсаңбаев.
Турнир барысында №6 балалар мен жасөспірімдер спорт мектебінің өрендері жеңімпаз атанды. Ал Шиелі ауданынан келген команда екінші орынға тұрақтаса, Қызылорда қаласындағы «Наман ата» спорт клубының ойыншылары үздік үштікке тұрақтады.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
