Қызылорда қалалық орталықтандырылған кітапханалар жүйесіне қарасты №16 кітапхананың ұйымдастыруымен қазақтың өр рухты ақыны Махамбет Өтемісұлының 220 жылдығына орай «Асқақ рухтың үні» атты әдеби круиз өтті.
Мақсаты – оқырмандарды М.Өтемісұлының өмірі мен шығармашылығымен таныстырып, туған жерін сүюге, батылдыққа тәрбиелеу. Шарада сөз алған №9 мектеп-гимназиясының тарих пәні мұғалімі Х.Сапар Исатай-Махамбет бастаған көтеріліс тарихы жайлы мәлімет берді.
– Махамбет – Исатай Тайманұлы бастаған көтерілістің көсемі әрі жалынды жыршысы, халқының азаттығын көксеген күрескер, ел бастаған батыр, қазақтың өр рухты ақыны. Ол от ауызды сөз шебері ретінде ғана ел арқасында даңққа бөленді. Шығармаларында ұлт-азаттық қозғалыс рухы, ел тағдыры мен арман-мүддесі терең әрі шынайы суреттелген, – деді ол.
Кітапхана оқырмандары ақынның жырларын мәнерлеп оқып, Махамбеттің Жәңгір ханға арнаған өлеңінен көрініс көрсетті. Күрескер ақынның күйшілік өнерін дәріптеу мақсатында Қорқыт ата атындағы Қызылорда университетінің студенттері Б.Ыбырайхан, Н.Қыдырбай «Қайран Нарын» күйі мен термелерін орындады.
Соңында «Өр рухты Махамбет» атты кітап көрмесі ұйымдастырылды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
