Сейсенбіде облыс әкімі Нұрлыбек Нәлібаевтың төрағалығымен «Ауыл аманаты» жобасын іске асыру бойынша мәжіліс өтті. Басқосуға ҚР Премьер-министрінің кеңесшісі Ералы Тоғжанов арнайы қатысты. Сондай-ақ жиында «AMANAT» партиясы облыстық филиалы, басқарма басшылары, қала, аудан әкімдері мен ауыл шаруашылығы мекемелерінің басшылары, ауылдық округ әкімдері болды.
Аймақ басшысы жоба аясында атқарылған жұмыстарға тоқталып, сала жетекшілеріне тапсырма жүктеді.
– Құрметті Ералы Лұқпанұлы, Сыр еліне қош келдіңіз! Жаңа қызметіңіздегі алғашқы жұмыс сапарыңызды біздің аймақтан бастағаныңыз үшін шынайы алғысымызды білдіреміз.
«Ауыл аманаты» жобасы ауыл халқының әл-ауқатын жақсартуға және әлеуметтік мәселелерін шешуге бағытталған. Жылдық 2,5 пайызбен жеңілдетілген несиелеу азаматтарға идеяларын жүзеге асыруға, өз ісін ашуға және жұмыссыздықты азайтуға мүмкіндік береді. Бағдарламаның оң нәтижесі көз алдымызда. Өткен жылы республикалық бюджеттен 3 млрд теңге қаралып, 406 жоба несиелендірілді, 713 жұмыс орны ашылды. Биыл 4 млрд 600 млн теңге қаржы бөлінуде.
Қала және аудан әкімдері, бағдарламаны тиімді, мақсатты пайдаланып, ауыл халқының табысын арттыруда жоғары көрсеткіштерге жетуіміз қажет. Бұл ретте ауыл әкімдеріне зор жауапкершілік жүктеледі. Әр ауданда құрылған жұмыс топтары белсенділік танытып, барынша сапалы және толыққанды жұмыс атқаруы тиіс, – деді Нұрлыбек Нәлібаев.
Жиында Ералы Тоғжанов бағдарлама ауыл тұрғындарының табысын арттыратынын, өндірумен қатар өткізу мәселесі шешілетінін, азық-түлік қауіпсіздігін қамтамасыз етуге мүмкіндік туатынын айтып, нақты міндеттер белгіледі.
– Мемлекет басшысының тікелей тапсырмасы негізінде қабылданған «Ауыл аманаты» жобасы осыдан үш жыл бұрын Жамбыл, Алматы және Ақтөбе облыстарында пилоттық жоба ретінде басталған болатын. Ауылды сақтап қаламыз десек, ең алдымен ауылдың халқын сақтап қалуымыз керек. Мен бұл жерде ішкі миграцияны айтып отырмын. Мәселен, Ақтөбе облысында соңғы үш жылда 17 мың адам ауылдан көшіп кеткен. Ол адамдар ешқайда кетпейді, әрі кетсе облыс орталығына, болмаса үлкен қалаларға барады. Ол адамдар неге көшті? Әрине, жұмыссыздықтан. Бүгінде тұрғындарды жұмыспен қамту – күн тәртібінде тұрған өзекті мәселе. Екінші мәселе – ауыл азаматтарының табысын арттыру. Азық-түлік қауіпсіздігін қамтамасыз ету де күйіп тұрған мәселе екені белгілі. Ауыл мәселесі шешілмей, қаланың проблемасын жою мүмкін емес. Осы орайда шешім қабылданып, пилоттық жоба ұсынылды. Бір жоба аясында бар проблеманы шешіп тастаймыз дей алмаймын, бірақ соған ықпал етіп, қадам жасаймыз. Осы мақсатта сіздермен бас қосып отырмыз. Мұның алдында Түркістан облысында болдым. Ол жерде де біраз мәселелер талқыланды, – деді Ералы Лұқпанұлы.
Басымдық өңірдің ерекшелігіне қарай өндірістік жобаларға беріледі. Сондай-ақ мал шаруашылығына қатысты несиелендірілген жобаларға асылтұқымды мал сатып алу талабы қойылды. Бұл өз кезегінде төрт түлік малды түрлендіруге жол ашып, жақындарының малын тіркеп қоюға кедергі болмақ. Нәтижесінде қаржы нақты мақсатына жұмсалады.
«Ауыл аманаты» жобасын іске асыруда 1 томат пастасы цехы, 34 жылыжай ашылып, 671 асылтұқымды төрт түлік алынды. Сонымен бірге, 21 сүт және ет өнімдері өндірісі ашылып, 66 ауыл шаруашылығы техникасы әкелінді. Оған қоса 14 балық шаруашылығы, 18 құс шаруашылығы өркен жайды. Жоба қатысушыларының арасынан 38 адам кондитер және нан өнімдерін пісірумен айналысып, 3 гидропоника, 7 жиhаз, 34 пластикалық өнімдер мен кұрылыс материалдары өндірісі, 98 қызмет көрсету орны ашылды. Қалған жобалар бойынша мониторинг жалғасуда. «Ауыл аманаты» жобасымен қамтылған 106 елді мекенде 51 ауыл шаруашылығы өндірістік кооперативі құрылып, 33 кооператив 716 млн теңгеге қаржыландырылды. Биылға орта есеппен 8 млн теңгеден алғанда, 575 жоба жүзеге асып, сәйкесінше 610 жұмыс орнын ашу көзделуде.
Айнұр БАТТАЛОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
