Нұртай САБИЛЬЯНОВ, Мәжіліс депутаты:
– Қазір банктер кәсіпкерлікке 20 пайызбен несие береді. Ондай пайызбен шағын және орта бизнесті дамыту мүмкін емес. Бұл үлкен кедергі. Ең бастысы осы мәселені шешетін болсақ, азаматтардың жұмыс істеуіне қолайлы жағдай туады. Тағы бір мәселе, биылдан бастап жаңа Салық кодексі енгізілді. Бірақ кәсіпкерлер тарапынан бірқатар мәселе туындап жатыр. Оның бірі – жеке кәсіпкер жеңілдетілген декларация жүйесімен жұмыс істейтін болса, онда ол заңды тұлғаның шығынына жатқызылмайды. Осы мәселені кейін қайта қарауымыз керек. Жалпы Салық кодексінің қолданылуы барысында кейбір мәселелерге байланысты өзгерістер енгізуге дайынбыз. Сонымен қатар экономика саласында, әсіресе ауыл шаруашылығын дамытуға қатысты көптеген мәселе бар. Айталық, «Ауыл аманаты» бағдарламасы жүзеге асырылып жатыр. Ауыл шаруашылығында кәсіпкерлікпен айналысатындарға 2,5 пайыз жеңілдетілген несиемен қаражат беріледі. Осы қаражаттың көлемін ұлғайтқан жөн. Сонымен қатар қаражатты алуда кепілдік мәселесі шешілмей жатыр. Өйткені ауылдағы үйлердің құны төмен. Ол кепілге келмейді. Сондықтан осы мәселені шешетін болсақ, ауыл шаруашылығын дамытуға мүмкіндік туады.
