Бала денсаулығына дәрігерлер ғана емес, ата-ана да жауапты. Себебі, дәрігер емінің нәтижелі болуы үйдегі күтімге де байланысты. Осы ретте «Ұмай» үкіметтік емес ұйымы жаңа жобаны жүзеге асыруды қолға алды.
Облыстық денсаулық сақтау басқармасының мемлекеттік әлеуметтік тапсырысы бойынша «Ұмай» үкіметтік емес ұйымы жыл аяғына дейін үш жобаны жүзеге асырмақ. Бұл туралы «Прима-парк» бизнес орталығында талқыланды.
– Басты мақсатымыз – медицина қызметкерлері мен ата-ана арасында алтын көпір қызметін атқару. Облыстық денсаулық сақтау басқармасымен әріптестік байланыс орнатып, жыл аяғына дейін үш жобаны жүзеге асырамыз. Атап айтқанда, бронх демікпесі ауруына шалдыққан науқастар үшін «Астма мектебі» оқытушы бағдарламасын енгізу және қан диабетімен ауыратын балаларды қолдау орталығында оқыту және кеңес беру арқылы олардың өмір сапасын жақсарту. Үшінші, өңірімізде балалар мен жасөспірімдер арасында йод жетіспеушілік, темір тапшылығы анемиясын төмендетуге арналған шаралар ұйымдастыру, – деді жоба жетекшісі Анар Ізден.
Балалардың денсаулығын жақсарту тек дәрігерге немесе дәрі-дәрмекке байланысты емес. Бала денсаулығына күтім жасауда ата-ананың ролі зор.
– Аталған аурулар аса күтімді қажет ететіндіктен, ата-ана сауаттылығын арттыру қажет. Бұл жоба нәтижелі болады деген сенімдеміз,– деді облыстық денсаулық сақтау басқармасының ана мен бала бөлімінің меңгерушісі Бибізада Дүйсенбаева.
Мәжілісте жобаны жүзеге асыру тиімділігі бойынша мамандар баяндама жасады, бірге талқылады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
