Е.Әуелбеков атындағы №4 облыстық дарынды балаларға арналған мектеп-интернатында тамыз конференциясының аясында педагогикалық қауымдастықтың «Тәрбие берудің тұжырымдамалық негізіне сәйкес жалпы білім беретін мектепте тәрбие үрдісін ұйымдастырудың заманауи тәсілдері» атты секциялық отырыс өтті.
Онда 2018-2019 жылдарға арналған жаңа әлеуметтік маңызы бар жобалар, мектептердегі оқу үрдісін ұйымдастырудың ерекшеліктеріне негізделген міндеттерді орындау жолдары мен «Рухани жаңғыру» бағдарламасы негізінде атқарылатын жұмыстар талқыланды. Педагогикалық кеңес бес бағыт бойынша ұйымдастырылып, оған ардагер мұғалімдер, мектеп директорының тәрбие жұмыстары жөніндегі орынбасарлары, педагог-психологтар, сынып жетекшілері, ата-ана комитетінің мүшелері қатысты.
– Бүгінгі күні білім басқармасының ұйытқы болуымен жаңа оқу жылы қарсаңында тәрбие саласында үлкен жұмыс жүруде. Биыл бес секцияға ерекше мән берілуде. Секция жұмыстарына байланысты басты жаңалықтардың бірі – 2018-2020 жылдарға арналған тәрбиенің жалпы тұжырымдамалық негіздерін іске асыратын іс-шара жоспары бекітілді, – деді облыстық білім басқармасы басшысының орынбасары Ақзира Қасымова.
Мұнан соң бала тәрбиесі, олардың арасында болатын зорлық-зомбылықтың алдын алу, жасөспірімдер арасындағы қылмысты азайту, оқушыларға жан-жақты тәрбие беру турасында баса айтты. Құқық бұзушылық, балалардың зорлық-зомбылыққа ұшырауы секілді оқиғалар қолайсыз отбасыларда туындап жатқандықтан, арнайы электронды база жасалған. Онда балалардың ата-аналары жайлы барлық мәліметтер орналастырылып, балалар ұдайы бақылауда болмақ. Оған қоса бұл база сала аралық байланыста болады. Балаларға әлеуметтік, денсаулық, төтенше жағдай салаларының араласуымен жан-жақты тәрбие беріліп, жақсы бағытта өсуіне ықпал етеді. Қазіргі таңда аталған саланың мамандары лекциялар оқып, тренингтер өткізуде. Алдағы уақытта әкелер кеңесі мен ата-аналар университеті құрылмақ.
Жиында осы секілді ауқымды мәселелер кеңінен талқыланып, атқарылатын жұмыстар легі түзілді. Сонымен қатар, ұсынымдар қабылданып, үздік оқушылар облыс әкімінің және білім басқармасының алғыс хаттарымен марапатталды.
Мейрамгүл
ДАУЫЛБАЙҚЫЗЫ,
“Сыр бойы”.
>>> Біздің Facebook, Instagram парақшаларымыз бен Telegram каналымызға жазылыңыз! <<<
