«Нұрлы жер» мемлекеттік бағдарламасының жаңа бағытының бірі «Шаңырақ» пилоттық жобасын «Тұрғын үй құрылыс жинақ банкі» жүзеге асырады. Бүгінде Шаңырақ «5-10-12» бағдарламасы бойынша өтініш қабылдау басталды. Бұл туралы өңірлік коммуникациялар қызметінде өткен брифингте «Қазақстанның тұрғын үй құрылыс жинақ банкі» АҚ облыстық филиалы директорының орынбасары Ильяс Жұрынов мәлімдеді.
Биыл пилоттық жобаны жүзеге асыру үшін бюджеттен 210 млрд теңге қаражат қарастырылған. Қаражаттың 90 млрд теңгесі «Тұрғын үй құрылыс жинақ банкіне» түскен. Жоба аясында 7-8 мыңдай отбасы баспанамен қамтылмақ. Жылдық мөлшерлемесі 5 процентке тең жеңілдетілген заемды алу үшін қатысушылар әкімдік кезегінде тұру керек. Сонымен қатар банк шотына алғашқы 10 проценттен кем емес соманы жарна ретінде жинауы шарт. Несиелендіру мерзімі – 20 жыл.
Жеңілдік баспанаға мұқтаж ретінде 1986 мен 2010 жылға дейінгі мерзімді қоса алғанда кезекте тұрған азаматтарға беріледі. Бұдан бөлек, бағдарламаға қатысу үшін соңғы алты ай ішіндегі отбасының әр мүшесіне келетін отбасылық табыстың бір айлық көлемі 3,1 күнкөріс минимумынан аспайтын еңбек және кәсіпкерлік қызметтен түсетін кірістің болуы сұралады. Бағдарлама бойынша баспананы тек жаңа салынған үйлерден алады. Құрылыс компанияларының тізімін арнайы сайттан көруге мүмкіндік бар. Ал, өтініш беру мерзімі – 17 тамыз бен 16 қыркүйек аралығы.
Бастысы, бағдарламаға қатысу үшін арнайы қойылатын 6 талапты орындау маңызды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
