Қазір елімізде ҚР Президентінің кезектен тыс сайлауын сапалы әрі әділ өткізу мақсатында заңға сәйкес жұмыстар атқарылуда. Соның айғағы, «Аманат» сайлауға бақылау жүргізу жөніндегі ұлттық қоғамдық платформасы аясында тәуелсіз бақылаушыларға арналған тренинг ұйымдастырылды.
Семинарда бақылаушыларға ОСК, кандидаттың сайлау штаб-пәтері және сайлауға қатысты аймақтарда заң бұзу фактісі тіркелсе, қандай әрекет жасау керектігі айтылды. Бақылаушы сайлау туралы заңнаманың орындалуын, айталық дауыс беру бөлмесінде үгіт-насихат материалдары болмауын, сайлаушымен бірге комиссия мүшесінің еріп кірмеуін қадағалауы қажет. «Аманат» азаматтық платформасында «Теңдік», «Саналы таңдау», «Әділдік», «Келісім», «Сенім» бағыты бойынша оқыту жоспарланған. Бұл бағыттар қоғамдық мониторинг жүргізу, сайлау мерзімі мен кезеңі, заңдық процестер туралы сайлаушыларға түсіндіру, саяси науқан туралы барынша ашық ақпарат тарату, әлеуметтік желіде әрбір сайлау бөлімшесі бойынша тәуелсіз бақылау жүргізіліп, оның барысы жарияланып тұру, қоғам мен мемлекет арасындағы тең ынтымақтастықты құру сынды талаптарға негізделген. Осы бес бағыт бойынша халықаралық ұйымдар, Орталық сайлау комиссиясы, жергілікті сайлау комиссиясы, Жоғарғы сот, жергілікті атқарушы орган, Бас прокуратура, кандидаттардың сайлау штабы, бұқаралық ақпарат құралдары, азаматтық және ғылыми-сараптамалық орталықтар өкілдерімен әріптестік орнатылады.
Тренингті танымал қоғам қайраткері, «Аманат» азаматтық платформасында 1-бағыттың кураторы Мұсағали Дуамбеков жүргізді. Семинардың модулі халықаралық талаптар мен тәжірибеге сай. Алдағы уақытта тренингке қатысушылар өзге аймақтарда бақылаушы міндеттері жөнінде дәріс беруіне болады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
