Әлем елдерін дүр сілкіндірген бұл індет – адамдар арасында тез таралатындығымен ерекшеленетін аса қауіпті кесел. Оның негізгі қоздырғышы – Covid-19 коронавирустың жаңа түрі.
Аурудан сақтану жайында халық арасында қаншама санитарлық-ағарту жұмыстары жүргізілгеніне қарамастан, тұрғындар тарапынан сақтық шаралары әлі де өз деңгейінде болмай тұр. Індеттің бірінші кезеңінде тұрғындардың санитарлық талаптарды дұрыс сақтамауынан, яғни қарапайым қағидаларды ұстанбауынан қаншама қиындықтарға кезіккенімізді, осының салдарынан індеттің тез өршіп кеткенін және оны ауыздықтау қиынға соққанын бәріміз де жақсы білеміз.
Енді міне, жан-жақтағы өңірлердің көпшілігінде індеттің екінші толқыны қайта өршіп жатыр. Сондықтан, тұрғындар мен жұмыс істеуге рұқсат етілген барлық еңбек ұжымдары санитарлық-эпидемиологиялық талаптарды қатаң сақтаулары тиіс. Қазіргі уақытта аудан әкімдігі тарапынан құрылған мобильдік топтар санитарлық талаптардың сақталуы бойынша сауда және көпшілік жиналатын орындарда болып, ақпараттық түсіндіру жұмыстарын қарқынды жүргізіп жатыр. Ең бастысы, туған күн, жиын-той, басқа да көпшілік жиналатын түрлі басқосуларды барынша тоқтатып, барыс-келісті мүмкіндігінше азайтуға баса мән беруіміз қажет. Адамдармен қарым-қатынаста, көшеде жүргенде үнемі бетперде киіп, қолды сәт сайын антисептикалық сұйықтықтармен жуып жүрген абзал. Біз сонда ғана қауіпті дерттен өзімізді және айналамыздағы жақындарымызды қорғай аламыз. Сондықтан жағдайға бейжай қарамай, індеттен сақтанайық, ағайын!
Асқан Отарбеков,
Жаңақорған ауданаралық ауруханасының жоғары санатты дәрігер-эпидемиологы
>>> Біздің Facebook, Instagram парақшаларымыз бен Telegram каналымызға жазылыңыз! <<<
