ҚР Оқу-ағарту министрлігінің ұйымдастыруымен жақында өткен дәстүрлі «Үздік педагог» республикалық байқауында сырбойылық 5 ұстаз «Үздік педагог» атағының иегері атанды. Осыған орай өңірлік коммуникациялар қызметінде құрмет төрінен көрінген ұстаздар брифинг өткізді.
– Бұл байқау 2012 жылдан бері үздіксіз ұйымдастырылып келеді. Жалпы конкурс үш кезеңнен тұрады. Аудандық, облыстық кезеңнен өткен ұстаздар республикалық кезеңде бақ сынайды. Биыл байқауға 961 мұғалім қатысты. Әр кезең бойынша іріктеліп, 139 мұғалім республикалық кезеңге жолдама алды. Олар бас қаладағы білім ордаларында біліктілігін көрсетіп, 64 мұғалім «Үздік педагог» атағына лайық деп танылды, – деді №3 ақпараттық технологиялар мектеп-лицейінің мұғалімі Әсел Пірмағамбетова.
– Байқау өте жоғары деңгейде өтті. Себебі еліміздің түкпір-түкпірінен білікті мамандар қатысып, практикалық, теориялық тұрғыдан өзара сынға түсті. Бұл білім бәйгесінде заманауи технологиялармен қатар, білім үдерісінде инновациялық көзқарас пен ұстаздардың тәжірибесіне мән берілді. Үздік атанған әріптестерімді құттықтаймын! – деді Қазанғап атындағы Қызылорда музыкалық жоғары колледжінің арнайы пәндер оқытушысы Әсия Боранғұлова.
– Республикалық кезеңге Қызылорда облысынан 10 ұстаз барған болатынбыз. Барлығымыз сайыс тапсырмасына сәйкес ашық сабақтар өткіздік. Ұстаздың кәсібилігі осы сабақтардан көрінді. Өйткені өзіміздің шәкірттерге емес, бейтаныс оқушыларға сабақ бердік. Әрине, әр сабағымызды ерекше әрі өзгеше идеямен өткізуге барымызды салдық. Әдіс-тәсілдеріміздің қорытынды бағасын қазылар алқасы таразылады. Осы байқаудағы ең жас педагогтердің бірі мен болдым. Десе де үздіктер қатарынан көрінгеніме қуаныштымын, – деді Е.Әуелбеков атындағы №4 облыстық дарынды балаларға арналған мектеп-интернатының мұғалімі Жазира Тынымбек.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
