Адам бойында Абай атамыз айтқан ішсем, жесем, ұйықтасам және білсем, көрсем, танысам деген екі мінез бар. Екіншісі ізденіске, шығармашылыққа, білімге, құштарлыққа үйретеді. Мектеп табалдырығын аттаған сәттен бастап ұстаздарымыз оқу-білімге, адами тәрбиеге баулиды. Парасат, табандылық, алғырлық, сабыр, еңбексүйгіштік, адамгершілік, мейірімділікке үйретеді. Мұғалімдеріміз «кітаппен дос бол» деп, құрбы-құрдастарымыздың, ортамыздың жақсы, еңбекқор, білімге жаны құмар адам болуын тілеп отыратын. Жасымыз жиырма, отыз, мейлі алпысқа келсе де, өмір бойы оқып, үйреніп, жаңалықтардан қалыс қалмауымыз маңызды дейтін. Қазіргі дамыған заманның, ХХІ ғасырдың заманауи, білікті тұлғалары техниканы, тез игеріп, кез келген жаңалықпен жұмыс жасауымыз қажет.
Жаңа білім мен ақпарат кез келген жерде: үйде, жұмыста, аулада, көшеде кездеседі. Үйдегі теледидар, көлікте қосылған радио, телефондағы әлеуметтік желілер, адамдармен қарым-қатынас кезіндегі диалог, кітаптар, газет-журналдар – барлығы да бізге кем дегенде бір жаңалық көрсетеді. Ата-әжелеріміздің де теледидар қарап немесе газет-журнал оқып отырғанын жиі байқаймыз. Көп жасаса да, әлі күнге дейін не оқиды екен деп таңданатын едім, қазір өмір бойы оқумен айналыссақ та, қаншама сыры әлі ашылып болмаған бұл ғаламның деректерін тауысып бітіре алмайтынымызды түсіндім. Ғылым – теңіз, білім – демекші, әр саланың өз қызығы, құпиясы, тереңдігі бар.
Бұрын өмір бойы ізденісте, қоғам мен ғылымдағы жаңалықтар жетегінде жүретін мамандық мұғалімдік деп ойлайтынмын. Бірақ қазір ойым өзгерді. Жетістікке жетіп, табысты боламын, дүниеге кірпіш секілді қаланып, өмірден өз орнымды табамын деген әрбір тұлға өмір бойы оқу мен өсуді қажет етеді екен.
Жетістік дегеніміз – бір мақсатқа бағытталған рухани және дене қуатының белгілі бір деңгейге, биікке жетуі.
«Тіліңмен жүгірме, біліммен жүгір» деген мақалдың сөз төркіні дұрыстығына, өмірдегі қажеттілігіне толықтай келісемін. Қазір адамның интеллекті, мәдениеті, жүріс-тұрысына қарап, қаншалықты білімді, көп білетіні байқалады. Бұл уақыт бос сөзбен қоғамда барлығына жаман жағынан көрінбей, алтынға татитын салмағы ауыр сөз арқылы көпшілікті өзіне қарата білетін ақылды адамдар заманы болып тұр.
Өмір бойы оқу – жетістікке жетудің жолы. Табысты болуға талпынған әрбір жан Мұхтар Әуезовтің мына сөзін есіне алуы керек деп білемін: «Білім – бақтың жібермейтін қазығы, білімсіз бақ – әлдекімнің азығы». Әлем тілдерін біліп, ғаламдағы жаңалықтарды, озық шығармаларды оқып, уақыт – ең қымбат валюта екенін ескере келе, ұтымды жұмыс жүргізу нәтижесінде кез келген адам жетістікке жетіп, оның табандылығы мен сенімділігі де арта түспек.
Бауыржан САҒЫМБАЙ,
Қорқыт ата атындағы Қызылорда университетінің студенті
