Қазақстанда екі айдың ішінде бірінші сыныпқа қабылдауға 250 мыңға жуық өтініш түскен. Бұл туралы Оқу-ағарту министрлігі мәлімдеді, – деп хабарлайды Tengrinews.kz тілшісі.
Оқу-ағарту министрлігі Орта білім комитетінің мәліметінше, бірінші сыныпқа қабылдау биылғы 1 сәуірде басталып, 2023 жылдың 1 тамызына дейін жалғасады.
«Бүгінгі таңда балаларды бірінші сыныпқа қабылдауға 249 737 өтініш түсті. Оның ішінде балалардың 70 пайызға жуығы мемлекеттік тілде оқуды таңдаған», – делінген хабарламада.
Биыл мемлекеттік тілде білім алғысы келетін бірінші сыныпқа баратындардың қатары көбірек екені айтылды. Қазақ тілінде оқытатын сыныптарға қабылдау бойынша ең жоғары көрсеткіштер қатарында Қызылорда (94,1 пайыз), Маңғыстау (93,2 пайыз), Ұлытау (82,5 пайыз), Түркістан (80,6 пайыз) және Жамбыл (79,4 пайыз) облыстары бар.
Қазіргі уақытта бірінші сыныпқа қабылдау туралы өтініштердің жоғары көрсеткішін Қызылорда (92 пайыз), Ұлытау (83,7 пайыз), Шығыс Қазақстан (78 пайыз), Маңғыстау (87,1 пайыз), Түркістан (79,8 пайыз) облыстары бастап тұр.
Азаматтарға ыңғайлы болу үшін қызмет автоматтандырылған. Құжаттар egov.kz веб-порталы арқылы қабылданады. Бірінші сыныпқа 6 жастан бастап балалар ата-анасының немесе баланың заңды өкілінің өтініші негізінде қабылданады.
Сонымен қатар денсаулық жағдайы туралы құжаттар және 3х4 көлеміндегі екі фотосурет тапсырылуы тиіс. Алдын ала болжам бойынша, биылғы жаңа оқу жылында 410 мыңнан астам қазақстандық бала бірінші сыныпқа барады деп жоспарланып отыр.
>>> Біздің Facebook, Instagram парақшаларымыз бен Telegram каналымызға жазылыңыз! <<<
