Мемлекеттік қызмет органдарына 20 жыл толуына орай Қазақстан Республикасы Мемлекеттік Қызмет істері және сыбайлас жемқорлыққа қарсы іс-қимыл агенттігі облыс бойынша департаментінің ұйымдастыруымен «Мемлекеттік қызметшілер әулеті» атты тақырыпта үздік бейнеролик байқауы өтіп, жеңімпаздар анықталды.
Жиында департамент басшысы Абзал Мұхимов өскелең ұрпақтың мемлекеттік қызметке деген қызығушылығын арттырып, отбасы мүшелерінің ізін жалғастыру, халыққа адал қызмет ету, мемлекеттік қызметті абыройлы атқаруды дәріптеу мақсатында өткізілген байқаудың маңыздылығы жайында кеңінен баяндады. Сонымен бірге алдағы уақытта мұндай шаралар жалғасын таба беретінін айтып, жеңімпаздарды марапаттады.
Елбасының «Болашаққа бағдар: рухани жаңғыру» атты бағдарламалық мақаласы аясында өткен байқаудың басты мақсаты аймақтағы мемлекеттік қызметшілер династияларын таныстыру болды.
Биылғы жылдың 16-19 наурызы аралығында өткен сайысқа қалалық және аудандық деңгейдегі мемлекеттік қызметшілерден 8 сұраным түскен. Байқау шарты бойынша бейнероликте үміткер қызметі, отбасы туралы әңгімелейді.
Айта кетейік, байқауға қатысқан бейнероликтер департаменттің әлеуметтік желідегі парақшасына жарияланып, жеңімпаздарды фейсбук жазылушылары ашық дауыс беру арқылы анықтады.
Байқау нәтижесі бойынша І орынды Қазалы ауданы, Әйтеке би кентінің әкімі Әліби Әбиев жеңіп алды. Екінші орынды Арал ауданы, Жіңішкеқұм ауылдық округі аппаратының бас маманы Мейрамбек Сатекеев алса, үшінші орынды Қармақшы аудандық экономика және бюджеттік жоспарлау бөлімінің сектор меңгерушісі Мұратбек Тұрғанов иемденді.
Барлық жүлдегерлер мен қатысушылар және мемлекеттік салада белсенді қызмет атқарып жүрген бірқатар азаматтар департаменттің Алғыс хаты және бағалы сыйлықтармен марапатталды.
Сара АДАЙБАЕВА,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
