Алғашқыда Қазалы паровоз депосының жанынан ФЗУ болып ашылып, кейін әртүрлі атауларды иеленген білім ошағы 2013 жылдың қаңтарынан Қазалы көлік-техникалық колледжі, екі жыл бұрын облыс әкімдігінің қаулысымен Қазалы көлік-техникалық жоғары колледжі статусын иеленді. Іргелі ұжымды қазір Білім беру ісінің үздігі Болатбек Ахметов басқарады. Кезінде ұлан-ғайыр Кеңес одағының түкпір-түкпірінен келген курсанттар дәріс алып, теміржол саласының ұсталарын, вагон жөндеушілер мен қараушыларды, вагон ағаш ұсталарын, өзге де мамандық иелерін дайындаған білім ордасының әлі де бәсі биік.
Мұнан тура 90 жыл бұрын іргетасы қаланған, Қазалы көлік-техникалық жоғары колледжіндегі салтанатты шараға ардагер ұстаздар, білім ордасының түлектері, әр ауданның колледждерінен келген оқытушылар қатысты.
Салтанатты шарада аудан әкімі Мұрат Ергешбаев іргелі білім ордасының терең тарихы туралы айтты. Теміржол саласының білікті мамандарын дайындайтын қарашаңырақ осы жылдар ішінде тарихи жолдан өтті. Колледждің материалдық-техникалық базасы нығайып, педагогикалық кадрлар әлеуеті жоғарылады. Оқу орнын бітірген кадрлар облыстың, ауданның әлеуметтік-экономикалық, мәдени-рухани салаларының дамып, өркендеуіне үлес қосып жүр.
Аудан әкімі ұлағатты ұстаздарды облыс және аудан әкімінің «Алғыс хатымен» марапаттады. Шарада облыстық білім басқармасының басшысы Майра Мелдебекова, «Қазақстандық салалық білім және ғылым қызметкерлерінің кәсіптік одағы» қоғамдық бірлестігі облыстық кәсіподақ комитетінің төрайымы Райкүл Байназарова, «Кәсіптік білім көкжиегі» газетінің бас редакторы Сексенәлі Раханов колледж ұжымын мерекемен құттықтады. Қазалы көлік-техникалық жоғары колледжінің директоры Б.Ахметов өзі басшылық жасайтын білім ордасының жетістігіне тоқталып, қонақтарға ризашылығын білдірді.
Салтанатты шарада мерейтойға орай жарық көрген «Күре жолдың шамшырағы» атты кітаптың тұсауы кесіліп, меймандарға таратылды.
Жұмабек ТАБЫНБАЕВ.
Қазалы ауданы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
