Орталық сайлау комиссиясының қаулысымен ҚР Президентінің кезектен тыс сайлауы жөніндегі сайлау бюллетенінің мәтіні бекітілді. Сайлау бюллетеньдері 17-19 қараша аралығында барлық сайлау учаскелеріне жеткізілетін болады. Бұл туралы өңірлік коммуникациялар қызметінде өткен брифингте облыстық сайлау комиссиясы төрағасының орынбасары Болат Накипов айтты.
Мұнан өзге, ҚР Президентін сайлауды облыс бойынша 382 сайлау комиссиясы ұйымдастыратын болады. Атап айтқанда, біреуі облыстық, біреуі қалалық, 7 аудандық және 373 учаскелік сайлау комиссиясы. Ал сайлау комиссиялары мүшелерінің жалпы саны 2710 адамды құрайды.
– Бұған қоса, дауыс беру күні, яғни 20 қарашада түрлі себептермен өзінің тұрғылықты тіркелген жерінен тыс аймақта болатын сайлаушылардың өз өтініштері негізінде есептен шығару куәліктері беріле бастады. Нақты кезеңде 142 адам есептен шығару куәліктерін алды. Есептен шығару куәліктері сайлаушыларға 19 қараша жергілікті уақытпен сағат 18.00-ге дейін берілетін болады. Сондай-ақ халықты әлеуметтік қорғау саласындағы жергілікті уәкілетті органның мәліметіне сәйкес, облыста мүгедектігі бар сайлаушылар саны – 20071 адам. Олардың 1 111-і кресло-арбамен қозғалатын, 324-і есту қабілеті бұзылған, 907-сі көру қабілеті бұзылған сайлаушылар. Осыған байланысты аймақтағы барлық учаскелерде мүгедектігі бар адамдардың дауыс беруін қамтамасыз ету шаралары қарқынды жүзеге асырылуда. Барлық сайлау учаскелері бекітілген нұсқаулыққа сәйкес мүгедектігі бар сайлаушылар үшін арнайы бұрыштар жабдықталған, – деді ол.
Сонымен қатар, барлық аумақтық және учаскелік сайлау комиссиялары арнайы әзірленген әдістемелік құралдармен қамтамасыз етілген.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
