Швейцариялық сайлаушылар қарт адамдардың өмір сүру деңгейіне қатысты ұлттық референдумда өздеріне қосымша айлық зейнетақы тағайындады, деп хабарлайды ВВС.
Олар енді жыл сайын 13-ші зейнетақы алатын болады.
Үкімет зейнетақы төлемдерін арттыру бюджетке тым қымбатқа түсетінін ескертті, бірақ референдумда сайлаушылардың 60%-ға жуығы «иә» деп жауап берді.
Швейцарияда ай сайынғы мемлекеттік зейнетақының толық мөлшері – 2550 еуро, бірақ көбі бұл сома елде тұру үшін жеткіліксіз дейді.
Швейцарияда, әсіресе Цюрих және Женева сияқты қалаларда тұру құны әлемдегі ең жоғарылардың қатарында.
Атап айтқанда, барлығына міндетті медициналық сақтандыру жарналары тез өсіп, егде жастағы адамдар кейде оны төлеуге қиналады.
Жұмыстан үзіліс алған әйелдер мен толық жұмыс өтілі жоқ иммигранттар үшін мемлекеттік жартылай зейнетақымен күн көру қиынға соғуда.
Елдегі көп адамның зейнетақысы жақсы, бірақ бәрінің емес. Сондықтан 70 жастан асқан швейцариялықтардың көбі жұмыс істеуге мәжбүр.
Зейнетақыны көбейту туралы ұсыныс кәсіподақтардан түскенімен, оған үкімет, парламент және бизнес өкілдері қарсы болып, бұны елдің қалтасы көтермейтінін айтты.
Швейцариядағы сайлаушылар қаржылық мәселелер бойынша үкіметтің кеңесін жиі тыңдайды: бірнеше жыл бұрын олар жыл сайын қосымша демалыс аптасын алып тастады.
Бірақ бұл жолы олар билікке сенбей, швейцариялық тікелей демократия жүйесін пайдаланып, ай сайынғы қосымша зейнетақыға дауыс берді.
Референдум нәтижесін олардың құқықтарын қорғайтын швейцариялық Avivo қауымдастығы «зейнеткерлердің тарихи жеңісі» деп бағалады.
Бұл қадам мемлекеттік зейнетақыны жылына 13 рет төленетін Швейцария жалақы жүйесіне сәйкестендіреді, ал жұмысшылар қараша айында екі еселенген төлем алады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
