Жуырда әлеуметтік желілерде және мессенджерлерде ипотекалық тұрғын үй қарыздары бойынша «кредиттік рақымшылық жарияланыпты-мыс» деген ақпарат тарады. Осыған орай газет тілшісі қаржы нарығын реттеу және дамыту агенттігінің Қызылорда қаласы бойынша өкілдігінің басқарма басшысы Ләззат Теміроваға түсінік беруін өтінген еді.
– Қазіргі уақытта 2007-2008 жылдардағы әлемдік қаржы дағдарысынан, сондай-ақ ұлттық валюта бағамының әлсіреуінен барынша зардап шеккен ипотекалық қарыз алушылардың жеке санатына көмек көрсету үшін агенттік 2015 жылдан ипотекалық қарыздарды қайта қаржыландыру бағдарламасын іске асыруда, – деді басқарма басшысы. – Осыған орай, бағдарлама талаптары бойынша қаржылық қолдау 2004-2009 жылдар аралығындағы кезеңде ипотекалық қарыз алған, сондай-ақ 2016 жылғы 1 қаңтарға дейін валюталық ипотекалық қарыз алған қарыз алушыларға көрсетіледі.
Бағдарламада белгіленген қаржылай көмек шаралары жалғыз баспанасы бар қарыз алушылар және халықтың әлеуметтік осал топтары (ХӘОТ) санатындағы борышкерлер үшін проценттік мөлшерлемені 3%-ке дейін төмендетуді көздейді. Қалған валюталық ипотекалық қарыз алушылар үшін проценттік мөлшерлеме 12%-тен аспайды. Бұдан басқа, бағдарлама шеңберінде сыйақы, айыпақы (өсімпұл, айыппұлдар) және комиссиялар бойынша мерзімі өткен берешек есептен шығарылды.
Валюталық ипотекалық қарыздарға қатысты берешекті Ұлттық Банктің 2015 жылғы 18 тамыздағы бағамы бойынша (1 АҚШ доллары үшін 188,35 теңге) теңгеге конвертациялау жүргізілді.
2020 жылғы қаңтардан бастап бағдарламаға қатысатын ХӘОТ санатындағы ипотекалық қарыз алушылар үшін қосымша көмек шаралары іске асырылуда. Мұндай қарыз алушыларға қолдауды банктер олардың қаржылық және әлеуметтік жағдайын жан-жақты талдау негізінде жеке тәртіппен көрсетуде. Талдау нәтижелерінен кейін банктер қарыз бойынша берешекті төмендету және 20 000 теңге мөлшеріндегі ай сайынғы төлеммен жеңілдік берілген кестелер белгілеу туралы шешім қабылдайды. Қарыз алушылардың бұл санатына қолдау көрсету 2021 жылдың соңына дейін аяқталады.
Осыған орай азаматтардың кейбір ақпарат құралдарының дәйексіз мәліметтеріне сенбеуді және ресми әрі тексерілген дереккөздерінен ғана алынған ақпаратты басшылыққа алуды сұраймыз.
Ипотекалық қарыздарды қайта қаржыландыру бағдарламасының талаптары мен нәтижелері туралы толығырақ ақпаратты агенттіктің ресми сайтынан мына сілтеме бойынша алуға болады: https://clck.ru/ZDhaA
Жолдасбек АҚСАҚАЛОВ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
