Облыстық «Мемлекеттік тіл және БАҚ» дәстүрлі байқауының биылғы жеңімпаздары анықталды. Бұқаралық ақпарат құралдары қызметкерлері күніне орай ұйымдастырылған іс-шарада облыстық ішкі саясат басқармасы басшысының орынбасары Руслан Қаюпов қаламгерлер қауымын кәсіби мерекемен құттықтады.
– Бұқаралық ақпарат құралдары – бұқараның бет бейнесі, ұлттық сананың «пульті». Демек қоғам жүгін арқалаған мамандық иелеріне қандай марапат көрсетсе де жарасымды. Ал соның ішінде ана тіліміздің абыройын асқақтатып, беделін көтеруге күш салып жүрген БАҚ өкілдерінің бүгінгі байқауының беделі биік екені даусыз, – деді ол.
Байқауда мемлекеттік тілдің қызмет аясын кеңейту, мәртебесін нығайту мақсатында қазақ тілінде жарық көрген жарияланымдар, эфирлерден көрсетілген хабарлар, сайт мақалалары қамтылған. Келіп түскен жұмыстарды Қазақстан Жазушылар одағы облыстық филиалының төрайымы Қаршыға Есімсейітова басқарған қазылар алқасы бағалап, қорытынды шығарды.
Байқау нәтижесімен «Үздік мақала» номинациясымен республикалық «Тіл мерейі» газетінің редакторы Миуа Байназарова, «Үздік телебағдарлама» номинациясымен «QYZYLORDA» телеарнасының жаңалықтар бөлімінің сарапшы-редакторы Қозы Көрпеш Жасаралұлы, «Үздік сайт мақаласы» номинациясымен «Ақмешіт жастары» газетінің тілшісі Гүлдана Жұмадинова марапатталды.
Сондай-ақ, «Халық» газетінің тілшісі Бекзат Аманов, «Қазалы» газетінің тілшілері Абзал Жолтерек пен Дина Бөкебай, «Жаңақорған тынысы» газетінің тілшісі Әсел Рзаева ынталандыру сыйлығын иеленді. Жеңімпаздарға басқарма дипломдары мен бағалы сыйлықтар тапсырылып, үздік материалдар байқаудың республикалық кезеңіне жолданды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
