• Сыр өңіріне басқа ұлттардың қоныстануы 1870 жылдардағы Орал казачествосындағы бүлікті басқаннан кейінгі 2 мыңға жуық казактың жер аударылуынан басталды.
• 1897 жылғы Бүкілресей санағының деректерінде Сыр өңірінде 60 ұлттың өкілі тұрады деп көрсетілген.
• Бірінші дүниежүзілік соғыс қарсаңында бұл жерге қоныс аударушылар саны күрт өсті. Оның бір себебі – «Орынбор-Ташкент» теміржолының салынуы. Соғыс кезінде одан қашқандар мен эвакуацияланғандар, тұтқындар келді.
• Кеңес өкіметінің күштеп қоныс аудару саясатының құрығына алдымен корейлер ілікті. Бұл науқанның алғашқы кезеңі 1935 жылы, екінші кезеңі 1937 жылы жалғасты. Онда Қиыр Шығысты мекендейтін корейлердің 98 454 адамы бар 20 789 отбасы көшірілді. Оның 50 мыңы Сыр өңіріне әкелінді.
• Кеңес Үкіметі Президиумының 1941 жылы 28 тамыздағы қаулысымен Еділ бойында, артынша Кавказда тұрып жатқан немістер жер аударылды. Сол жылдары Қызылорда облысына қоныс аударған немістер саны – шамамен 3000 мен 5000 аралығында.
• 1944 жылы 26 мыңнан астам шешен, ингуш ұлтының өкілі Арал мен Жаңақорған аудандарының аралығына қоныстандырылды.
• Месхетин түріктерінің 2 мыңға жуық өкілі де облыстың барлық ауданына орналасты.
• 1949 жылы грек ұлтының өкілдері әкелініп, жапон тұтқындарымен бірге Қызылорда плотинасын салуға атсалысты.
