Цукербергке сұрақ
АҚШ Сенатында Meta корпорациясының басшысы Марк Цукербергті әлеуметтік желілердің ықпалынан зардап шеккен ата-аналардан кешірім сұрауға мәжбүрледі.
Тыңдаулар кезінде балаларды интернетте сексуалдық мақсатта пайдаланудағы интернет-платформалардың ықпалы талқыланды. Сенатор Джош Хоули Цукербергке қарап: «Сіз, балалары әлеуметтік желінің құрбаны болған ата-аналардан кешірім сұрадыңыз ба?» деп сұрады жиында.
Цукерберг ата-аналарға бұрылып қарап, кешірім сұрады және Meta компаниясының балаларға тигізер зиянын азайтуға барынша күш салатынын жеткізді. Сенатор Хоули Цукербергті әлеуметтік желілердегі зиянды контенттер мен бір-бірінің ар-намысына тию әрекеттерін жоюға шақырды.
Халықаралық түйе жылының ашылу салтанаты
БҰҰ Бас Ассамблеясы 2024 жылды Халықаралық түйе жылы деп жариялады. Осыған орай Моңғолияда Халықаралық түйе жылының ашылу салтанаты ұйымдастырылды.
Өткен жылы Моңғолия Үкіметі тиісті қаулы шығарды.
«Моңғолияда түйе өсірушілермен, үкіметтік емес ұйымдармен, қауымдастықтармен, ғалымдармен және бизнес өкілдерімен түйе сүтін өндіру кластерін құру бойынша жұмыс істеп жатырмыз. Баянхонгор аймағында түйе сүтін өңдейтін зауыт құрылып, алғашқы нәтижелер бар. Дәл осындай зауытты басқа аймақта құруды қолға алып жатырмыз» деді Азиядағы сүт өнеркәсібін дамыту жөніндегі серіктестік хатшылығының атқарушы директоры Б.Батбаяр.
Ашылу салтанатында сөз алған Моңғол жүн және кашемир қауымдастығының атқарушы директоры Д.Алтанцэцэг моңғолдар мал шаруашылығынан алынатын шикізаттың бәрін пайдаланатынын атап өтті.
Болат қаңқадан салынған үйлер
Түркияның Кахраманмараш аймағында жер сілкінісінен зардап шеккен ауылдарда болат қаңқадан салынған алғашқы үйлер тапсырылады.
Бұл туралы Түркияның қоршаған орта, қала дамуы және климаттың өзгеруі министрі Мехмет Ожасеки Instagram әлеуметтік желісіндегі парақшасында мәлім етті. Министр ауыл үйлерінің суретін жүктеген.
«Болаттан салынған ауыл үйлерін берудің бірінші кезеңін бастаймыз. Соңғы 6 күн қалды» деп жазды ол.
Өткен жылы 6 ақпанда Түркияның оңтүстік-шығысындағы Газиантеп провинциясында 6,4-6,6 магнитудалы, кейін 7,4 магнитудалы қуатты жер сілкінісі болған еді. Жерасты дүмпулері елдің 10 провинциясында, сондай-ақ көршілес мемлекеттерде, соның ішінде Сирияда да сезілді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
